Адыгэ Республикэм гандболымкIэ ибзылъфыгъэ командэ Урысыем щыпсэурэ лъэпкъхэм я Спартакиадэ хэлэжьагъ ыкIи яенэрэ чIыпIэр къыщыдихыгъ.
Зэнэкъокъур шышъхьэIум и 16-м къыщегъэжагъэу и 25-м нэс къалэу Самарэ щыкIуагъ. Тишъолъыр къэзыгъэлъэгъуагъэр Мыекъопэ «АГУ-Адыифыр» ары.Турнирым командэ пшIыкIутIу хэлэжьагъ, ахэр Урысыем и Суперлигэ щешIэх.Апэрэ едзыгъом Никита Голуб зипэщэ тикомандэ ешIэгъуитф иIагъ. Краснодар краир (25:28), Москва (13:35) ыкIи Астраханскэ хэкур (27:31) къытекIуагъэх. Удмуртскэ Республикэм (34:21) ыкIи Санкт-Петербург (36:27) зэIукIэгъухэр къашIуихьыгъ. «АГУ-Адыифым» куп едзыгъом яплIэнэрэ чIыпIэр щиубытыгъ ыкIи ыпэкIэ лъыкIотэн амал иIэ хъугъэ. КъыкIэлъыкIорэ уцугъом Ростовскэ хэкур 19:38-у тикомандэ нахь лъэшыгъ. Ащ къыхэкIэу республикэм игандболисткэхэр я 5 — 8-рэ чIыпIэхэм афэбэнэнхэ фае хъугъэ. Астраханскэ ыкIи Волгоградскэ хэкухэр тикомандэ къытекIуагъэх, зэфэхьысыжь яенэрэ чIыпIэр типшъашъэхэм къыдахыгъ. Тигандболисткэу Анастасия Федоровам къэлапчъэм гъогогъу 27-рэ Iэгуаор дидзагъ.Ящэнэрэ чIыпIэр Московскэ хэкум къыдихыгъ, ар 34:31-у Краснодар краим текIуагъ. Финалым щызэIукIагъэх Москва ыкIи Ростовскэ хэкум якомандэхэр. Къэралыгъом икъэлэ шъхьаIэ илIыкIохэр 37:29-у нахь лъэшыгъэх, ахэм дышъэ медальхэр къахьыгъэх.Мыгъэрэ Спартакиадэр Урысыем ишъолъыриблымэ ащэкIо: Свердловскэ, Калининградскэ, Омскэ, Самарскэ, Челябинскэ хэкухэм, Башкортостан ыкIи Татарстан. ТекIоныгъэ къыдэзыхырэм ахъщэ шIухьафтынэу сомэ мин 500, ятIонэрэ чIыпIэр зыфагъэшъуашэрэм сомэ мин 300, ящэнэрэм — сомэ мин 200 аратыщт.