Делэкъо А.
АР-м и Къэралыгъо Совет — Хасэм ияенэрэ зэIугъэкIэгъу идепутатынымкIэ хэдзынхэм ахэлэжьэщт политическэ партиехэм ацIэхэмрэ ятамыгъэхэмрэ бюллетеньхэм зэрэрагъэхьащтхэр гъэнэфэгъэным пае хэдзынхэмкIэ Гупчэ комиссием тыгъуасэ пхъэдз зэхищагъ.
Iофтхьабзэм хэлэжьагъэх Адыгеим ипрофсоюзхэм япащэу Устэ Руслъан, цIыфхэм яфитыныгъэхэр къэухъумэгъэнхэмкIэ Адыгеим и Уполномоченнэу Михаил Шебанец, комиссием хэтхэр, политическэ партиехэм ялIыкIохэр.Пхъэдзым къызэригъэлъэгъуагъэмкIэ, политическэ партиеу ЛДПР-р ятфэнэрэу, КПРФ-р яплIэнэрэу, политическэ партиеу «Урысые Федерацием и Коммунистическэ партие» ящэнэрэу, социалистическэ политическэ партиеу «Справедливая Россия» зыфиIорэр апэрэу, Урысые политическэ партиеу «Единэ Россиер» ятIонэрэу, «Новые люди» зыфиIорэр яхэнэрэу къыхахыгъэх. Мыщ фэгъэхьыгъэ протоколым комиссием хэтхэр кIэтхагъэх.— Пхъэдзыр шапхъэхэм адиштэу зэрэкIуагъэр нэрылъэгъу тфэхъугъ. Хэдзынхэм Общественнэ палатэр ахэлэжьэщт, пшъэрылъ шъхьаIэу тиIэр общественнэ лъыплъакIохэр дгъэхьазырынхэр ары. Ащ епхыгъэ Iофыгъохэр зэшIотэхых, зэкIэмкIи нэбгырэ 600-м нахь мымакIэу дгъэхьазырынэу тэгъэнафэ, — къыIуагъ Устэ Руслъан.Михаил Шебанец джащ фэдэу пшъэрылъ гъэнэфагъэхэр зэряIэр къыхигъэщыгъ, анахьэу анаIэ зытырагъэтыщтыр апэрэу хэдзыным хэлэжьэщт ныбжьыкIэхэр ары.Зичэзыу зэхэсыгъуIофтхьабзэм ыуж я 92-рэ зэхэсыгъо АР-м и Гупчэ комиссие зэхищагъ. Iофтхьабзэр зэрищагъ ащ и Тхьаматэу Сэмэгу Нурбый. Пэублэм пхъэдзым къыгъэлъэгъогъэ зэфэхьысыжьым комиссием хэтхэм дырагъэштагъ. Нэужым зы мандат зиIэ хэдзыпIэ коеу N 24-мкIэ яенэрэ зэIукIэгъумкIэ Адыгэ Республикэм и Къэралыгъо Совет — Хасэм идепутатынымкIэ кандидатэу зыкъэзыгъэлъэгъогъэ КIыкI Рузанэ зэрадырамыгъэштагъэр Гупчэ комиссием исекретарэу ХьацIэцIэ Фатимэ къыIуагъ. Шапхъэхэм адиштэу ежь-ежьырэу зыкъэзыгъэлъэгъогъэ кандидатым зэрэдырагъаштэрэр къэзыушыхьатырэ IэпэкIэдзэ 385-рэ иIэн фэягъ. Бзылъфыгъэм къырихьылIэгъэ IэпэкIадзэхэр зауплъэкIухэм, пстэумкIи шапхъэхэм адиштэу IэпэкIэдзи 166-рэ ныIэп къыхэкIыгъэр, ащ елъытыгъэу икандидатурэ дырагъэштагъэп. Мы хэдзыпIэ кой дэдэм идепутат хъунэу зыкъэзыгъэлъэгъогъэ ЯхъулIэ Вячеслав IэпэкIэдзэ 390-рэ къырихьылIагъ, ау шапхъэхэм адимыштэу агъэнэфагъ, икандидатурэ пхырыкIыгъэп.АР-м и Къэралыгъо Совет — Хасэм идепутат хъунымкIэ зикандидатурэ къэзыгъэлъэгъогъэ Мира Галюковам джащ фэдэу ищыкIэгъэ тхылъхэр игъом къызэрэримыхьылIагъэхэм ыпкъ къикIыкIэ кандидатыцIэр Iахыжьыгъ. Социалистическэ политическэ партиеу «Справедливая Россия» зыфиIорэм къыгъэлъэгъогъэ спискэм нэбгырэ 25-рэ хэтыгъ. Ахэм ащыщэу нэбгырищымэ ятхылъхэр игъом къырахьылIэжьыгъэхэп, ащ къыхэкIыкIэ адырагъэштагъэп.Iофтхьабзэм нэмыкI упчIэхэми ащытегущыIагъэх, унэшъо гъэнэфагъэхэр ашIыгъэх.КандидатищмэадырагъэштагъШышъхьэIум и 13-м щыIэгъэ зэхэсыгъом АР-м и Къэралыгъо Совет — Хасэм ияенэрэ зэIугъэкIэгъу идепутат хъунымкIэ Оркъыжъый Алый, НатIэкъо Адам, Хъурум Казбек адырагъэштагъ. Кандидат зэрэхъугъэхэр къэзыушыхьатырэ тхылъхэр аратыжьыгъэх.ДЕЛЭКЪО Анет.