Цэй З.
Урысыем ителе- ыкIи ирадиокъэтын хъытыу загъэпсыгъэр илъэс 25-рэ мы мазэм хъугъэ. Ащ икъутамэу радио- ыкIи телевизионнэ сыджхэр къэзытырэ Гупчэу Адыгэ Республикэм щылажьэрэм ар мэфэкI шIыкIэм тетэу хигъэунэфыкIыгъ. Илъэс пчъагъэм яIоф фэшъыпкъэу лэжьагъэхэр зэхахьэм щагъэшIуагъэх.
2001-рэ илъэсым шышъхьэIум и 13-м УФ-м и Президентэу Владимир Путиным иунашъокIэ Урысыем ителевизионнэ ыкIи радиокъэтын хъытыу агъэпсыгъагъ. Телевизионнэ ыкIи радиосыджхэр къызщатIупщырэ гупчэу къэралыгъом ичIыпIэ зэфэшъхьафхэм ащитэкъухьагъэхэр зэкIэ зэхэугъоегъэнхэ ыкIи зы чIыпIэ къеуалIэхэу шIыгъэныр ащ ипшъэрылъ шъхьэIагъ. Адыгэ Республикэм и Гупчи Урысыем щылэжьэрэ канал анахь шъхьаIэхэм япхыгъэу ыпэкIэ Iоф ышIэщтыгъ.— Зы хъытыум тыхэтэу тызылажьэрэр илъэс 25-рэ хъугъэ. Охътэ бэдэдэ текIыгъэу пIошъущтэп, ау зэхэт хъытыум Iофыбэ ыгъэцэкIэнэу игъо ифагъ. 2009-рэ илъэсым щегъэжьагъэу 2019-рэ илъэсхэм анэс цифрэ шIыкIэм тетэу телевидениер лэжьэнэу ригъэжьагъ. ЦIыфхэмкIи ар нахь гупсэф хъугъэ. Сыда пIомэ, ыпэкIэ зэрэщытыгъэр пштэмэ, телевизорым еплъыщтыгъэхэм яамалхэр зэфэдагъэхэп: къэлэ инхэм ащыпсэухэрэм канал заулэ къырагъэубытышъущтыгъэмэ, районхэм арыт псэупIэхэм зы канал е зыпари къанэмысэу хъущтыгъэ. Урысые теле- ыкIи радиокъэтын хъытыур къэралыгъом ичIыпIэ анахь чыжьэхэми джы анэсы, — къеIуатэ Урысые теле- ыкIи радиокъэтын хъытыум икъутамэу «Радио ыкIи телесыджхэр къэзытырэ Гупчэу Адыгэ Республикэм» щыIэм ипащэу Александр Еременкэм.Джырэ уахътэм Урысые хъытыум ыгъэфедэрэ техникэр игъэкIотыгъэу зэрахъокIы. IэкIыбым къикIырэ Iэмэ-псымэхэр тикъэралыгъо къыщыдагъэкIыгъэхэмкIэ зэблахъух.
ЗэхъокIыныгъэхэр зэкIэ зылъэгъугъэу республикэ Гупчэм щылажьэхэрэм ащыщ Кушъэкъо Алый. 1983-рэ илъэсым ащ иIофшIэн ригъэжьэгъагъ.— Сэ сыкъызэкIуакIэм, тишъолъыр и Гупчэ тигъунэгъу Краснодар краим епхыгъэу лажьэщтыгъ. 1991-рэ илъэсым ащ къыхэкIыжьыгъагъ. Илъэс 43-рэ хъурэ гъогур псынкIэу къыпфэIотэщтэп. Дунаир зэрэзэхъокIырэм, кIэу къыхахьэхэрэм ялъытыгъэу тэри зэблэхъун горэхэр тиIэ зэпытыгъэх. КIэкIэу къэпIон хъумэ, зыщедгъэжьэгъагъэмрэ джы тызнэсыгъэмрэ зэбгъапшэмэ, кIэлэцIыкIу IыгъыпIэмрэ апшъэрэ еджапIэмрэ зэрэзэпэчыжьэхэм фэд, — къеIуатэ Гупчэм иинженерэу Кушъэкъо Алый.Адыгеир пштэмэ, радио- ыкIи телевизионнэ сыджхэр къэзытырэ Гупчэм хахьэхэу чIыпIэ 15 щэлажьэ. Ахэр зэкIэ зы зэкъодзапIэм щызэпхыгъэх. Ахэм яIофшIэн лъэплъэ, Iофыгъохэр къапыкIыгъэмэ егъэтэрэзыжьы Алый.Радио- ыкIи телевизионнэ сыджхэр къэзытырэ республикэ Гупчэм нэбгырэ 53-рэ щэлажьэ. ЯIофшIэн фэшъыпкъэхэу илъэс пчъагъэхэм Iоф зышIагъэхэр зыщагъэшIогъэхэ зэхахьэ Гупчэр зыкIэрыт Мэздахэ щыкIуагъ. АР-м и ЛIышъхьэу КъумпIыл Мурат ыцIэкIэ къызэрэугъоигъэхэм афэгушIуагъ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт. ЦыхьэшIэгъоу, зыпкъитыныгъэ ахэлъэу, яIоф шъыпкъэныгъэ фыряIэу зэрагъэцакIэрэмкIэ рэзэныгъэ гущыIэхэр ащ афигъэзагъ. ЫпэкIи яIофшIэн гухахъо хагъуатэу рылэжьэнхэу, псауныгъэ пытэ ежьхэми яунагъохэми яIэнэу афэлъэIуагъ. АР-м и ЛIышъхьэ ыцIэкIэ рэзэныгъэ тхылъхэр аритыжьыгъэх.Урысыем ителе- ыкIи ирадиокъэтын хъытыу ипащэ, АР-м и Къэралыгъо Совет — Хасэм, Мыекъуапэ иадминистрацие ацIэкIэ щытхъу тхылъхэмкIэ зимэфэкIхэр агъэшIуагъэх. «Урысыем ителе- ыкIи ирадиокъэтын хъытыу иIофышIэ гъэшIуагъ» зыфиIорэ цIэ лъапIэр къэзыушыхьатырэ бгъэхалъхьэр фагъэшъошагъ Кушъэкъо Алый.Цэй Замир.