ФутболымкIэ Адыгеим и Кубок икъыдэхын фэгъэхьыгъэ зэнэкъокъур Мыекъуапэ щаухыгъ.
Мазэрэ кIогъэ Iофтхьабзэм кIэщакIо фэхъугъэх Адыгеим футболымкIэ и Федерациерэ АР-м физическэ культурэмкIэ ыкIи спортымкIэ и Комитетрэ. ЕшIэгъухэр зэкIэ стадионэу «Юностым» щыкIуагъэх.Зэнэкъокъум командэ 16 хэлэжьагъ. ЗэхэщакIохэм тур пэпчъ зэфэхьысыжьхэр фашIызэ, футболист анахь дэгъухэр къыхагъэщыгъэх, Адыгеим ыкIи Къэрэщэе-Щэрджэсым ябизнесменхэм агъэхьазырыгъэ шIухьафтынхэр ахэм афагъэшъошагъэх.
Адыгеим и Кубок къыдэзыхыгъэр ыкIи хагъэунэфыкIырэ чIыпIэхэр зыфагъэшъошагъэхэр мы мафэхэм къэнэфагъэх. Ящэнэрэ чIыпIэм фэбэнагъэх Кощхьэблэ районым икомандэу «Зихи» ыкIи республикэм икъэлэ шъхьаIэ къэзыгъэлъэгъорэ «Легионыр». ЕшIэгъум ия 9-рэ такъикъ Андрей Переверзевым къэлапчъэм Iэгуаор дидзагъ, бысымхэр ыпэ ишъыгъэх. Ау охътабэ темышIэу хьакIэхэм пенальти агъэцэкIагъ, Джыгунэ Арсен пчъагъэр 1:1 ышIыгъ. Такъикъибл тешIагъэу «Зихи» хэт Джамал Пашевым къэлапчъэм Iэгуаор дидзагъ. Ау «Легионыр» къызэкIэкIуагъэп, ятIонэрэ таймым ипэублэ ащ икапитанэу Бжьэц Бислъан пчъагъэр 2:2 ышIыгъ. Арэущтэу охътэ шъхьаIэр командэхэм аухыгъ. Ящэнэрэ чIыпIэр къыдэзыхыщтыр пенальтикIэ къэнэфагъ. Мыщ кощхьаблэхэр нахь щылъэшыгъэх.Финалым щызэIукIагъэх «Кавказ-Адэмыемрэ» (Красногвардейскэ район) «Алиромрэ» (Мыекъопэ район). Футболыр зыгу рихьырэ нэбгыришъэм ехъу зэIукIэгъум еплъыгъ. Футболистхэм ешIэкIэ дахэ къагъэлъэгъуагъ, текIоныгъэр къыдэзыхыщтыр къэшIэгъоягъ. Мы командэхэми пенальти агъэцэкIэным пэблэгъагъэх, ау зэIукIэгъур аухынкIэ такъикъ заулэ къэнагъэу «Алиром» хэт Эльдар Ширяевым къэлапчъэм Iэгуаор дидзагъ, командэм текIоныгъэ къыфихьыгъ.Турнирым икъэлэпчъэIут анахь дэгъоу къыхахыгъэр Карпо Киркоров («Алиро»), ухъумэкIо анахь дэгъоу алъытагъэр Артем Юркевич («Алиро»), гузэгум щешIэхэрэмкIэ — Джыгунэ Арсен («Зихи»), ыпэкIэ щешIэхэрэмкIэ — Артем Мельник («Кавказ-Адэмый)», къэлапчъэм анахьыбэу Iэгуаор дэзыдзагъэр Андрей Переверзевыр («Легион») ары, зэнэкъокъум иешIэкIо анахь дэгъу хъугъэ Александр Красновыр («Кавказ-Адэмый»).