Iэшъынэ А.
Къоджэ псэупIэхэр зэтегъэпсыхьэгъэнхэм, къалэхэм адэс цIыфхэм амалэу яIэм фэдэхэр къоджэдэсхэм агъотыным Адыгеим игъэкIотыгъэу щыдэлажьэх. Кощхьэблэ районым ит поселкэу Майскэм изэхъокIыныгъэхэр нэрылъэгъух.
«Къоджэ псэупIэхэм хэхъоныгъэ ашIыныр» зыфиIорэм ишIуагъэкIэ илъэс заулэкIэ узэкIэIэбэжьымэ культурэм и Унэрэ фельдшер-мамыку IэзапIэрэ кIэу ащ щашIыгъэх. ДжырэкIэ анахьэу зыуж итхэр къатыбэу зэтет унэхэм ящагухэр зэтегъэпсыхьэгъэнхэр ары.— ТипсэупIэ нахь дахэ, гупсэф зышIыщт къэралыгъо программэхэм тазэрахэлэжьэщтым тыпылъ. Iэрыфэгъу щыIакIэр щыгъэпсыгъэным мэхьанэ етэты. 2019-рэ илъэсым къыщегъэжьагъэу программэу «Iэрыфэгъу къэлэ щыIакIэр» зыфиIорэм ишIуагъэкIэ къатыбэу зэтет унэхэм ящагухэр зэтетэгъэпсыхьэх. ЗэкIэмкIи мыщ фэдэ уни 10 поселкэм дэт, ахэр щагуиплI мэхъух. Апэрэ илъэсхэм сомэ миллиони 2 зырыз къатIупщызэ щагуитIу зэтедгъэпсыхьагъ. 2022 — 2023-рэ илъэсхэм ахъщэм къыхагъэхъуагъ, сомэ миллиони 10-у къатIупщыгъэмкIэ тIу агъэцэкIэжьыгъ. Проектыр илъэситIум телъытэгъагъэми, IофшIэнхэр илъэскIэ зэрифэшъуашэу, шапхъэхэм адиштэу зэшIуахыгъэх. Джы зы къэнагъ, ащ епхыгъэ проектыр хьазыр, сомэ миллион 16-м ехъу тефэнэу къалъытэгъагъ, ар щэу гощыгъэн фэещт. Охътабэ темышIэу IофшIэнхэр едгъэжьэнхэу тэгугъэ, — еIо Майскэ къоджэ псэупIэм иадминистрацие ипащэу Андрей Дацкэм.
Щагоу зэтырагъэпсыхьагъэхэм зэкIэми ыпэрапшIэу асфальт атыралъхьагъ, лъэсрыкIо гъогухэр фашIыгъэх, кIэлэцIыкIухэр зыщыджэгущтхэ чIыпIэхэр агъэпсыгъэх, тетIысхьапIэхэр агъэуцугъэх, ахэм апэблагъэу хэкIыр зэрадзэщтхэр ыкIи къэзыгъэнэфырэ пкъыгъохэр ащагъэуцугъэх. Щагу пэпчъ автомобильхэр зыщагъэуцущтхэ чIыпIэхэр къыдыхэлъытагъэх.
ПсэупIэр мыинми, ищыкIагъэр зэкIэ дэт, зэтегъэпсыхьагъ. Мыщ нэбгырэ 2670-м ехъу щэпсэу, процент 50-р пенсионерых. НыбжьыкIэхэм нахьыбэмкIэ вахтэ шIыкIэм тетэу Iоф ашIэ. Хэгъэгур къаухъумэнэу мыщ щыщ нэбгырэ 56-рэ ежь яшIоигъоныгъэкIэ хэушъхьафыкIыгъэ дзэ операцием кIуагъэх.Майскэм гурыт еджапIэ, кIэлэцIыкIу IыгъыпIэ дэт, культурэм и Унэу ашIыгъэм нэбгырэ 200-м ехъу чIэфэ. Джыри хэхъоныгъэхэр ашIынхэм зэрэпылъыщтхэр пащэм къытфиIотагъ. Мыщ щыпсэухэрэм ренэу заIуегъакIэ, гумэкIыгъоу яIэхэр къарегъэIуатэ. Нэбгырэ пэпчъ ипсэупIэ нахь кIэракIэ зэрыхъущтым пылъ. Ар къеушыхьаты цIыфхэр къыхэлажьэхэзэ агъэпсырэ бюджетым ипрограммэ илъэс къэс зэрэхэлажьэхэрэм. Ащ ишIуагъэкIэ арт-псэуалъэхэр ашIыгъэх, шIэжьым иаллее агъэпсыгъ, гъэрекIо къыщегъэжьагъэу гъогухэм къэзыгъэнэфырэ пкъыгъохэр атырагъэуцонхэу аублагъ. ДжырэкIэ гъогуищ къэнэфы, мы илъэсым джыри зы къыхэхъощт. Поселкэм чъыгхэр бэу дэтых, нахь зыщычъыIэтэгъэ чIыпIэхэм тетIысхьапIэхэр ащагъэуцугъэх.
Андрей Дацкэм къызэрэтиIуагъэмкIэ, гумэкIыгъо шъхьаIэу яIэр гъогухэм язытет ары. Нахьыбэмэ асфальт ателъыгъ, ахэм гъэцэкIэжьынхэр япшIылIэ къодыекIэ хъурэп, кIэу атеплъхьан фае. Поселкэм хэхъоныгъэхэр ышIынхэмкIэ IэпыIэгъу къафэхъухэрэм зэкIэми, анахьэу Кощхьэблэ район администрацием ипащэ, зэрафэразэр тигущыIэгъу кIэухым къыхигъэщыгъ.
Нэужым зэтырагъэпсыхьэгъэ щагухэр къэткIухьагъэх, ахэм ащыпсэухэрэм гущыIэгъу тафэхъугъ.— Тищагу анахь дахэхэм ащыщ. КIэлэцIыкIухэр зыщыджэгущтхэ чIыпIэ яI, ахэм ячэф макъэ зымыуасэ щыIэп. Тэри тетIысхьапIэмэ татес, мафэрэ чъыIэтагъ, пчыхьэрэ зэпэнэфыжьы, — еIо урамэу Заводскаям щыпсэурэ Аидэ.— Тищагу джырэ шапхъэхэм адиштэ хъугъэ, тыди асфальт телъ, къабзэ, автомобильхэр зыдэщытыщт чIыпIэхэр шъхьафэу иIэх, ар гупсэф. Къэралыгъо IэпыIэгъум шIуагъэ къызэритырэр нэрылъэгъу тфэхъугъ, ащ тегъэгушIо, — еIо мыщ щыпсэурэ Нэфсэт.ДЕЛЭКЪО Анет.