Программэу «Урысыем инеущырэ маф» зыфиIорэм къыдыхэлъытагъэу Адыгэ Республикэм икъэлэ шъхьаIэ теннис цIыкIумкIэ зэIухыгъэ зэнэкъокъу щырекIокIы.
Урысыем ишъолъыри 8-мэ —Адыгеим, Донецкэ Народнэ Республикэм, Къырым, Краснодар ыкIи Ставрополь крайхэм, Волгоградскэ, Нижегородскэ ыкIи Ростовскэ хэкухэм яспортсмен ныбжьыкIэхэм заушэты.Мы мафэхэм зыныбжь илъэс 12-м емыхъугъэ кIалэхэмрэ пшъашъэхэмрэ зэнэкъокъугъэх. КIалэхэр нэбгырэ 41-рэ хъущтыгъэх, ахэм ащыщэу 6-р тиреспубликэ илIыкIох. ТиспортсменхэмкIэ къэгъэлъэгъон анахь дэгъу зиIэр рейтингымкIэ апэрэ чIыпIэм щыт Кощхьэблэ районым ипсэупIэу Вольнэм щыщ Дмитрий Устянскэр ары. Ар ятIонэрэ хъугъэ, кIэух едзыгъом ащ къытекIуагъ къалэу Пятигорскэ къэзыгъэлъэгъогъэ Александр Липаткиныр, пчъагъэр — 1:3. Волгоград щыпсэурэСулейман Джумагалиеым джэрз медаль фагъэшъошагъ.Пшъэшъэ 28-у зэнэкъокъугъэхэм ащыщэу 4-м Адыгеир къагъэлъэгъуагъ. Селоу Вольнэм щыщ Пелагея Калининам ятIонэрэ чIыпIэр къыдихыгъ. Финалым 3:0-у ащ къытекIуагъ къалэу Тимашевскэ испортсменкэ. Краснодар къэзыгъэлъэгъогъэ Анастасия Савельевар ящэнэрэ хъугъэ.Зыныбжь илъэс 14-м шIомыкIыгъэхэм яхэшыпыкIын зэнэкъокъухэр рагъэжьагъэх. Ащ къыдыхэлъытагъэу непэ кIалэхэми пшъашъэхэми Адыгэ къэралыгъо университетым иордэунэу Кобл Якъубэ ыцIэ зыхьырэм зыщаушэтыщт, текIоныгъэм ыкIи хагъэунэфыкIырэ чIыпIэхэм афэбэнэщтых.Джащ фэдэу мы мэфэ дэдэм нэбгыритIоу зэгъусэхэм язэнэкъокъу рагъэкIокIыщт. Неущ зыныбжь илъэс 18-м емыхъугъэхэм заушэтыщт.БзэшIу Асхьад.