Мыекъуапэ щызэхащэгъэ лъэс зекIонымкIэ Iофтхьабзэу «Тайные тропы здоровья» зыфиIорэм изэфэхьысыжьхэр мы мафэхэм ашIыгъэх. Республикэм икъэлэ шъхьаIэ физическэ культурэмкIэ ыкIи спортымкIэ и Комитет ащ кIэщакIо фэхъугъ.
Марафоным нэбгырэ 92-рэ хэлэжьагъ. Мыекъуапэ щыпсэухэрэм ямызакъоу, республикэм ирайонхэм, Краснодар краим ялIыкIохэм заушэтыгъ.ЗэхэщакIохэм зэрагъэнэфагъэу, нэбгырэ пэпчъ мэфи 7-м лъэбэкъу мини 100 къыкIун фэягъ. А пшъэрылъыр нэбгырэ 63-мэ агъэцэкIагъ. Анахь гъэшIэгъоныр, ахэм янахьыбэр, нэбгырэ 48-р, бзылъфыгъэх. Ащ джыри зэ къегъэлъагъо бзылъфыгъэхэм пшъэрылъ зыфагъэуцужьын ыкIи лъэкIэу яIэр рахьылIэзэ ар агъэцэкIэн зэралъэкIырэр.Лъэсэу къэпкIухьаным мэхьанэшхо иI, ащ фэдэ екIолIакIэм цIыфым ыпкъынэ-лынэ, ипсауныгъэ егъэпытэ. Психологием ылъэныкъокIи шIуагъэ къызэритырэми щэч хэлъэп. Жьы къабзэм хэтэу паркым е мэзым къащызыкIухьэрэр нахь рэхьат мэхъу, тыкъэзыуцухьэрэ чIыопсым идэхагъэ зэрифэшъуашэу зэхешIэ.Хабзэ зэрэхъугъэу, мыр физкультурникым и Мафэ ехъулIэу рагъэкIокIыгъ. Илъэсым къыкIоцI лъэс зекIонымкIэ Iофтхьэбзэ зэфэшъхьафхэр Мыекъуапэ физическэ культурэмкIэ ыкIи спортымкIэ и Комитет зэхещэх. Ахэр мэфэкI гъэнэфагъэхэм япхыгъэх: ТекIоныгъэм и Маф, къалэм и Маф, ИлъэсыкIэр, нэмыкIхэри.Лъэбэкъу мини 100 къэзыкIугъэхэм къалэжьыгъэ щытхъу тхылъхэр мы мэфэ благъэхэм аратыжьыщтых.Марафоным хэлэжьагъэхэм, анахьэу кIэух едзыгъом нэсыгъэхэм, тафэгушIо, спорт текIоныгъакIэхэр къыдахынхэу афэтэIо.БзэшIу Асхьад.