Зи Хэкужъ къэзыгъэзэжьыгъэм и Мафэ фэгъэхьыгъэу къуаджэу Мэфэхьаблэ физкультурэ-спорт мэфэкI Iофтхьабзэ щырекIокIыгъ.
Программэм хэхьагъэх кIэлэцIыкIухэм апае «Веселые старты» зыфиIорэмрэ нахьыжъхэм ателъытэгъэ футболымкIэ зэнэкъокъурэ.Тыркуем, Сирием, Израиль, Иорданием, нэмыкI къэралыгъохэм къарыкIыжьыгъэ тилъэпкъэгъухэм яунагъохэм заушэтыгъ. Фестивалым пшъэрылъ шъхьаIэу иIэр лIэужхэм язэпхыныгъэ гъэпытэгъэныр ыкIи къэзыгъэзэжьыгъэхэр щыIэныгъэм хэгъэгъозэжьыгъэнхэр ары.
МэфэкIыр кIэлэцIыкIухэр зыхэлэжьэгъэхэ музыкальнэ зарядкэмкIэ рагъэжьагъ. Ащ ыуж зыныбжь имыкъугъэхэр нэбгырэ пшIырыпшI хъухэу команди 4-у загощыгъ ыкIи лъэныкъо зэфэшъхьафхэмкIэ зэнэкъокъугъэх, эстафетэхэм ахэлэжьагъэх. Нэбгырэ пэпчъ джэголъэ шъабэ шIухьафтынэу ратыгъ.Къуаджэм щыпсэурэ нахьыжъхэр футбол цIыкIумкIэ зэнэкъокъугъэх. Мыщ зыныбжь илъэс 18-м ехъугъэхэр хэлэжьэнхэ амал яIагъ. Сирием къикIыжьыгъэхэм зэхащэгъэ командэу «Саусэрыкъом» текIоныгъэр къыдихыгъ, «Мэфэхьабл-1» ыкIи «Мэфэхьабл-2» зыфиIохэрэм хагъэунэфыкIырэ чIыпIэхэр афагъэшъошагъэх. Ахэр кубокэхэмкIэ ыкIи щытхъу тхылъхэмкIэ къыхагъэщыгъэх.Iофтхьабзэм кIэщакIо фэхъугъэх Адыгеим физическэ культурэмкIэ ыкIи спортымкIэ и Комитет, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэмкIэ ыкIи къэбар жъугъэм иамалхэмкIэ и Комитет, чIыпIэ администрациер, общественнэ организациехэр.