КъохьэпIэ Кавказым ичIыпIэ анахь дахэхэм ащыщэу къушъхьэу Фыщт фестивалэу «Фыщт иджэгунхэр» я 26-у щыкIуагъ.
Илъэс пчъагъэ хъугъэу мы Iофтхьабзэм зипсауныгъэ зыгъэпытэ ыкIи зызыгъэпсэфы зышIоигъохэр зэрепхых. Мызыгъэгум ащ нэбгыри 150-рэ фэдиз хэлэжьагъ.Фестивалым ыцIэ зыхьырэ къушъхьэр Адыгеим ичIыопс идэхагъэ итамыгъэу щыт, ащ дакIоу, хабзэ зэрэхъугъэу, мыщ альпинистхэр ыкIи зекIохэр бэу щызэрэугъоих. Мызыгъэгум тиреспубликэ имызакъоу, Краснодар краим ыкIи Москва ялIыкIохэри фестивалым зэрищэлIагъэх. Программэр гъэшIэгъонэу ыкIи лъэныкъо зэфэшъхьафхэр къыдыхэлъытагъэу щытыгъ. Классическэ спорт лъэпкъхэу волейболымкIэ, футбол цIыкIумкIэ командэхэр зэнэкъокъугъэх, джащ фэдэу дартсымкIэ ыкIи нардхэмкIэ заушэтыгъ.Iофтхьабзэм хэлажьэхэрэм сыдигъуи ашIогъэшIэгъон унэгъо эстафетэу «Сян, сят, сэры — зекIо унагъу» зыфиIорэр. Зэфэхьысыжьхэм къызэрагъэлъэгъуагъэмкIэ, мы лъэныкъом текIоныгъэр къыщыдихыгъ Джэджэ районым икомандэ. Джащ фэдэу мы муниципалитетым илIыкIохэр футбол цIыкIумкIэ ятIонэрэ хъугъэх, нардхэмкIэ ыкIи волейболымкIэ ящэнэрэ чIыпIэр афагъэшъошагъ.Ныбджэгъуныгъэм ыкIи зыкIыныгъэм ятамыгъэу щыт Iофтхьабзэр узIэпищэу, гъэшIэгъонэу зэхэщакIохэм рагъэкIокIыгъ. Зичэзыу я 27-рэ фестивалым джы зыфагъэхьазырыщт.