Министрэм годзакIэ иIэ хъугъэ

Адыгеим и ЛIы­шъхьэу КъумпIыл Мурат IофшIэгъу зэIукIэгъу адыриIагъ республикэм куль­турэмкIэ иминистрэу Аулъэ Юрэрэ ащ игодзакIэу Пхъэ­чыяшIэ Суандэрэ.

2026-рэ илъэсым бэдзэогъум и 30-м а IэнатIэм ар Iуагъэхьагъ. ЗэдэгущыIэгъум хэлэжьагъ АР-м и ЛIышъхьэ и Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Бэгугъэ Азэмат.Республикэм культурэм ылъэ­ныкъокIэ ихэхъоныгъэ епхыгъэ анахь зигъо Iофыгъохэм зэIу­кIэгъум илъэхъан ахэр атегущыIагъэх, министрэм игодзакIэ пшъэрылъхэр фагъэуцугъэх, IофшIэнымкIэ анахьэу анаIэ зытырагъэтын фэе лъэныкъохэр къыхагъэщыгъэх. АР-м культурэмкIэ иминистрэу Аулъэ Юрэ къызэриIуагъэмкIэ, культурэм иминистрэ игуадзэ ипшъэрылъхэм ахэхьэх культурэм иунэхэм, тхылъеджапIэхэм, музейхэм Iофэу ашIэрэр уплъэкIугъэныр, лъэпкъ Iэпэщысэхэм япхыгъэ IофшIэным нахь зегъэушъомбгъугъэныр, адыгэхэу IэкIыб къэралхэм арысхэм адыряIэ культурнэ зэпхыныгъэхэр гъэпытэгъэнхэр.КъумпIыл Мурат къыхигъэщыгъ а лъэныкъохэм мэхьа­нэшхо зэряIэр ыкIи тапэкIи зягъэушъомбгъугъэн зэрэфаер. Адыгеим и ЛIышъхьэ къызэри­IуагъэмкIэ, республикэм икультурнэ кIэн къэухъумэгъэнымкIэ ыкIи зегъэушъомбгъугъэ­нымкIэ, культурэм ипсэуалъэхэр гъэцэкIэжьыгъэнхэмкIэ, кIэхэр шIы­гъэнхэмкIэ бэ шъо­лъырым щызэшIуахырэр. А лъэныкъомкIэ къуаджэхэм яинфраструктурэ уахътэм диштэу шIыгъэным мэхьанэшхо зэриIэри къыкIигъэтхъыгъ. Лъэпкъ проектэу «Унагъом», федеральнэ Iофтхьэбзэ зэфэшъхьафхэм, партиеу «Единэ Россием» ипрограммэ а IофшIэныр лъыгъэкIотэгъэнымкIэ IэпыIэгъушIоу щытых.Адыгеим и ЛIышъхьэ АР-м культурэмкIэ иминистрэрэ ащ игодзакIэрэ пшъэрылъ афи­шIыгъ амалэу щыIэхэр нахь шIогъэ ин хэлъэу агъэфедэнхэу, респуб­ликэм икультурнэ щыIакIэ цIыфхэр нахьыбэу къыхэгъэлэжьэгъэнхэм анаIэ тырагъэтынэу. КъумпIыл Мурат Пхъэ­чыяшIэ Суандэ ынаIэ тырыригъэдзагъ культурэм иучреждениехэм пIуныгъэ-гъэсэныгъэ Iофтхьабзэхэр зэращызэшIуа­хыхэрэр нахь гъэлъэшыгъэн зэрэфаем. Къуаджэхэм адэт псэуалъэхэу культурэм епхы­гъэхэм яIофшIэнкIэ хэушъхьафыкIыгъэ пшъэрылъхэри къыхагъэщыгъэх. Лъэпкъ культурэр ыкIи хэбзэ-зэхэтыкIэхэр къэу­хъумэгъэнхэмкIэ а гупчэхэм мэхьанэшхо яI.«Мы аужырэ илъэсхэм культурэм иинфраструктурэ игъэкIотыгъэу ­агъэцэкIэжьыгъ, непэ нахь дэгъоу гъэфедэгъэнхэ фае ащ къытырэ амалхэр. Къуаджэхэм ащыпсэурэ нэбгырэ пэпчъ зыфэщэгъэ лъэныкъом елъытыгъэу игуапэу культурэм иучреждение къэкIонышъ, Iоф­тхьабзэу ащ щызэшIуа­хыхэрэм ахэлэжьэн, титворческэ куп цIэры­Iохэм якъэгъэлъэгъонхэм гухахъо ахигъотэн ­ылъэ­кIыным тегъэпсы­хьагъэу Iофыр зэхащэн фае», — къыIуагъ ­Адыгеим и ЛIышъхьэ.Республикэм ипащэ къызэ­рэхигъэщыгъэмкIэ, адыгэхэу IэкIыб къэралхэм арысхэм культурэм ылъэныкъокIэ адытиIэ зэпхыныгъэми нахь зегъэу­шъомбгъугъэн фае. Республикэм иансамблэ цIэрыIохэр нахьыбэрэ ахэм аIукIэнхэ, ныдэлъфыбзэмрэ культурэмрэ якъэу­хъумэн, лъэныкъуитIумкIи зэдызэхэтщэрэ культурнэ Iофтхьабзэхэм къахэгъэлэжьэ­гъэнхэ фае.Адыгеим и ЛIышъхьэ къыхигъэщыгъ ПхъэчыяшIэ Суандэ пэщэныгъэ зехьэгъэнымкIэыкIи журналист IофшIэнымкIэ IэпэIэсэныгъэу иIэр пшъэ­дэкIыжь зыхэлъ IэнэтIакIэм къыщыуцурэ пшъэрылъхэм ягъэ­цэкIэн гъэхъагъэ хэлъэу зэрэщигъэфедэшъущтым зэрэщыгугъырэр.ПхъэчыяшIэ Суандэ цыхьэ къызэрэфишIыгъэм пае рес­публикэм и ЛIышъхьэ зэрэфэразэр къыIуагъ ыкIи пшъэрылъэу щытхэм язэшIохын ыкIуачIэ зэрэрихьылIэщтымкIэ ар ыгъэгугъагъ.Лъэпкъхэм язэкъошныгъэ и Урысые университет сэнэхьатэу «журналистикэмкIэ» ащ къыухыгъ, тхылъеджапIэм иIофшIэн щыригъэжьэгъагъ, нэужым корректорэу Iоф ышIагъ, аужырэ илъэси 8-м Адыгэкъалэ къыщыдэкIырэ гъэзетэу «Единствэм» щылэжьагъ, 2023-рэ илъэсым къыщыублагъэу ащ ипэщагъ. Журналистикэм ылъэныкъокIэ Адыгеим и ЛIышъхьэ ишIухьафтын къыфагъэшъошагъ. Муниципальнэ ыкIи шъолъыр мэхьанэ зиIэ культурнэ Iофтхьэбзэ заулэмэ ягъэхьазырынрэ язэхэщэнрэ иIахь ахишIыхьагъ.АР-м и ЛIышъхьэ ипресс-къулыкъукъытырэ къэбархэмкIэ Тхьаркъохъо Сафыет.