«ЧIыгу Iэбжыбыр» гухэм алъэIэсы

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэр я 3-рэ театральнэ фестивалэу «Вахтангов. Путь домой» зыфиIорэм хэлэжьагъ. «ЧIыгу Iэбжыб» зышъхьэ спектаклыр тиартистхэм Владикавказ къыщагъэлъэгъуагъ.

Москва итеатрэу Е. Вахтанговым ыцIэ зыхьырэр ары фестивалым икIэщакIор. Ящэнэрэ илъэс хъугъэу ар зэхащэ. Тикъэралыгъо ит театрэхэр пштэхэмэ, осэшI купым къыхихэу ащ хэлэжьэн фитыныгъэ зэратырэр 5 ныIэп.— Фестивалым тыхэлэжьэнэу тхылъхэр тэ дгъэхьыгъэхэп. Фестивалэу «Дышъэ маскэм» спектаклыр къыщыдгъэлъэгъуагъ. Ащ уасэ щыфашIыгъэщтын, ежь Вахтанговым ыцIэ зыхьырэ театрэм ипащэу Кирилл Крок къытеуи фестивалым тыригъэблэгъагъ. Театрэм хэщэгъэ пстэури мы Iофтхьабзэм хэлажьэ шIоигъу, культурэм ылъэныкъокIэ мэхьанэшхо ащ иI. Арышъ, фестивалыр тиспектаклэкIэ зэрэзэфашIыжьыгъэм уасэу къытфашIыгъэр зэрэиныр къегъэлъагъо, — къыIуагъ УФ - м итеатральнэ IофышIэхэм я Союз икъутамэу Адыге­им щылажьэрэм итхьаматэу Ацумыжъ Рустам.

Баграт Шинкуба ироманэу «Последний из ушедших» зыфиIорэм техыгъэу ­«ЧIыгу Iэбжыб» зышъхьэ спектаклыр агъэуцугъ. Убых лъэпкъыр ичIыгу зэрэрагъэкIыгъа­гъэм ар фэгъэхьыгъ. Аужырэ убыхэу илъэси 100 зыныбжь Золэкъо Заур­къан игукъэкIыжьхэмкIэ ар къэIотагъ. Лъэпкъым къехъулIэгъэ гугъэузыр къекIолIагъэхэм тиактерхэм алъагъэIэсын, зэхарагъэшIэн алъэкIыгъ.— Дэгъу дэдэу къытпэгъокIыгъэх. Спектаклым цIыфхэр зэрежагъэхэр къахэщыгъ. Къэгъэлъэгъоныр зыщыкIуа­гъэм чIыпIэ нэкI иIагъэп. Театроведхэми спектакльхэм уасэ афэзышIыхэрэми «ЧIыгу Iэбжыбыр» агу рихьыгъ. Фестивалым къыращэлIэгъэ адырэ къэ­гъэлъэгъонхэм ар анахь дэгъоу алъы­тагъ, — къыхегъэщы Ацумыжъ Рус­там.Къэралыгъом испектаклэ анахь дэгъу 30-мэ ясатырэ зэрэхэтыр «ЧIыгу Iэбжыбым» къыгъэшъыпкъэжьыгъ. Зэлъа­шIэрэ советскэ режиссер бэлахьэу Евгений Вахтанговым ыцIэ зыхьырэ унэ-музеим къыхэхыгъэ чырбыщ такъы­рым хэшIыкIыгъэ статуэткэмрэ фестивалым зэрэхэлэжьагъэр къэзыушыхьатырэ дипломымрэ Лъэпкъ театрэм къы­фагъэшъошагъэх. Къэралыгъо телеканал шъхьаIэмэ Адыгеим икIыгъэ къэ­гъэлъэгъоным фэгъэхьыгъэ къэбарыр къатыгъ.«ЧIыгу Iэбжыбыр» зыгъэуцугъэр режиссерэу Константин Мишиныр ары. Тикъэралыгъо спектаклыр щызэлъашIэгъах. Владикавказ ыуж тиартистхэр Къэбэртэе - Бэлъкъар Республикэм еблэгъагъэх. Ащ адыгабзэкIэ къэгъэлъэ­гъоныр къыщашIыгъ. Адыгеим щыкIощт фестивалэу «Вершина» зыфиIорэри «ЧIыгу Iэбжыбым» къызэIуихыщт. Дунэе мэхьанэ зиIэ Iофтхьабзэу ЦIэмэз Iоныгъом щыкIощтым спектаклыр ащэщт. Чъэпыогъум Москва къыщагъэлъэгъощт.ЦэйЗамир.