КIэлэцIыкIухэм ягъэмэфэ зыгъэпсэфыгъо Адыгеим щыжъот. Мы илъэсым а кампанием кIэлэеджэкIо мини 9-м ехъу къызэлъиубытыщт.
Мафэрэ кIэлэцIыкIухэр зыдэщыIэрэ лагерь 93-рэ мы гъэмафэм республикэм къыщызэIуахыгъ. Мыхэм анэмыкIэу Мыекъопэ районым 2 щыI: «Лань» ыкIи «Горная легенда» зыфиIохэрэр. Ахэр анахьэу зыфытегъэпсыхьагъэхэр спортыр, хьисапыр, химиер ыкIи биологиер арых. Хы ШIуцIэ Iушъом щыIэ лагеритIуми кIэлэцIыкIухэр ащыIэнхэ алъэкIыщт. ЕджэнымкIэ, спортымкIэ ыкIи творчествэмкIэ гъэхъэгъэшхохэр зышIыгъэ кIэлэеджэкIо 20-м ехъумэ урысые гупчэхэм защагъэпсэфыгъ.Адыгеим ынаIэ зытет Херсон хэкум ирайонхэм ащыпсэухэрэм ащыщхэри республикэм къэкIох. Мы илъэсым нэбгыри 199-мэ мыщ зыщагъэпсэфыгъ. Гъэсэныгъэм тегъэпсыхьэгъэ ыкIи уахътэр нахь гъэшIэгъонэу зэрагъэкIощтым епхыгъэ Iофтхьабзэхэр ахэм апае зэрахьэх.
«Полярис-Адыгея» зыфиIорэмрэ технопаркэу «Кванториумымрэ» «Апэрэхэм я Движение» ягъусэу мастер-классхэр зэхащэх: робототехникэм къыщегъэжьагъэу генетикэм, биотехнологиехэм, астрономием ыкIи физикэм анэсыжьэу Iофтхьабзэхэр зэхащэх. Джащ фэдэу программэм къыхеубытэх республикэм ичIыопсырэ икультурэрэ нэIуасэ афашIынхэр, къэгъэлъэгъон зэфэшъхьафхэм яплъынхэр ыкIи къакIухьаныр.
— Шъолъыр зэфэшъхьафхэм къарыкIыгъэ кIэлэцIыкIухэм бзэ къызэдагъотынымкIэ, хэбзэ-зэхэтыкIэхэр зэрагъэшIэнхэмкIэ, Iоф зэдашIэнымкIэ ащ фэдэ Iофтхьабзэхэм яшIуагъэ къэкIо. Хэгъэгум и Президентэу Владимир Путиным Урысыем щыпсэурэ цIыф лъэпкъхэм языкIыныгъэ и Илъэсэу тызхэт илъэсыр зэригъэнэфагъэм а пстэуми мэхьанэу яIэр нахь къеIэтэу сэлъытэ.ЗэкIэ кIэлэцIыкIухэм сафэлъаIо языгъэпсэфыгъо уахътэ гъэшIэгъонэу агъэкIонэу, акIуачIэ изэу илъэсыкIэ еджэгъум пэгъокIынхэу, — къащитхыгъ АР-м и ЛIышъхьэу КъумпIыл Мурат исоциальнэ нэкIубгъохэм.