«Ошъад»
УФ-м и Правительствэ ыкIи культурэмкIэ и Министерствэ, лъэпкъ творчествэм и Унэу Поленовым ыцIэ зыхьырэр, Республикэу Башкортостан культурэмкIэ и Министерствэ Iофтхьабзэм изэхэщакIох. Урысыем ишъолъыр 78-мэ къарыкIыгъэ творческэ купи 130-рэ ащ хэлэжьагъ.
— Лъэпкъ зыкIыныгъэм и Илъэсэу кIорэм ар фагъэшъошагъ. Лъэпкъ творчествэм и Унэу Поленовым ыцIэ зыхьырэм ипащэу Тамара Пуртовар фестивалым щыIагъ. Зэнэкъокъу хэмылъэу, къэралыгъом щыпсэурэ лъэпкъ зэфэшъхьафхэм якультурэ ибаигъэ къагъэлъэгъоныр зэхэщакIохэм пшъэрылъ шъхьаIэу къагъэнэфагъ. Ащ фэдиз шъолъырмэ къарыкIыгъэ творческэ купхэм апэ титэу мэфэкI урам зекIор къызэIутхыгъ. ТикъэшъуакIохэм адыгэ шъуашэхэр ащыгъхэу Уфа иурам шъхьаIэ къырыкIуагъэх. Къэлэ гупчэу «Советскэм» концертхэр щыкIуагъэх. Фестивалым икъызэIухын ыкIи изэфэшIыжьын ахагъэлэжьэгъэ куп 19-мэ тахэтыгъ, — хигъэунэфыкIыгъ творческэ зэхахьэу «Ошъадэм» ипащэу, АР-м культурэмкIэ изаслуженнэ IофышIэу, Чэчэн Республикэм искусствэхэмкIэ изаслуженнэ IофышIэшхоу Едыдж Викторие.
ТикъэшъокIо цIыкIухэм япрограммэ къэшъуищ хэтыгъ — убых, къэшъо къуанщэр ыкIи лъэпэтетхэм атетэу къашIырэр. Едыдж Викторие къызэриIуагъэмкIэ, Республикэу Башкортостан культурэмкIэ иминистрэ нэсэу тилъэпкъ шъуашэ, лъэпэтетхэр ашIогъэшIэгъоныгъэх, къэшъуакIохэм ягъусэхэу фестивалым хэлэжьэгъабэмэ сурэтхэр зытырахыгъэх.
— Тыва, Приморскэ хэкум, Архангельскэ, Нижегородскэ хэкум, Алтай, Къыблэ лъэныкъом ишъолъырыбэхэм — Ингушетием, Къэрэщэе-Щэрджэсым, Дагъыстан, Чэчэным, Къалмыкъ Республикэм, Луганскэ къарыкIыгъэ купхэм фестивалыр къагъэдэхагъ. Тикъэралыгъо щыпсэурэ лъэпкъхэм язэфэмыдэныгъэ, хэушъхьафыкIыгъэ культурэу ахэлъымрэ зыкIыныгъэу тызэрыгушхорэмрэ фестивалыр яшыхьат шъыпкъэ хъугъэ. КIэухым фестивалым къекIолIэгъэ купхэр зэкIэ зыхэлэжьэгъэ къэшъо-уджэу «Русская капуста» зыфиIорэр, «хороводкIэ» заджэхэрэр къызэдашIыгъ. УеплъынкIэ гъэшIэгъоныгъэ, нэбгырэ 750-рэ ащ хэлэжьагъ, пстэумэ апэ итыгъэхэр «Синдикэм» и «Спутник» зыфатIоу кIэлэцIыкIу купэу джы дгъасэхэрэр ары. Апэрэ дэкIыгъоу мыр яIагъ. Ахэм илъэс 11 — 16 аныбжь нахь мышIэми, фестивалым ипрограммэ афэукIочIыгъ, пшъыгъэхэми къызхагъэщыгъэп. ШъошакIэу афэтыдыгъэхэр ащыгъхэу, тилъэпкъ культурэ зэрифэшъуашэм фэдэу, дахэу фестивалым къыщагъэлъэгъуагъ, тарыгушхуагъ, Адыгэ Республикэр шъуашэу къэдгъэлъэгъуагъ, — къыIотагъ Едыдж Викторие.