ФутболымкIэ Урысые зэнэкъокъум иятIонэрэ лигэ зыкъыщызыгъэлъэгъорэ «Зэкъошныгъэм» изэIукIэгъухэр лъегъэкIуатэх.
ЕшIэгъуихым зэлъыпытэу джэгукIэ дэгъу тикомандэ къыгъэлъэгъогъагъэмэ, аужырэм къытекIуагъэх.«Кызылташ» — «Зэкъошныгъ» — 3:2 (0:1)
Къэлапчъэм Iэгуаор дэзыдзагъэхэр: Н. Васильев (я 24-рэ такъикъыр), А. Оболенцев (я 58-рэ ыкIи 76-рэ такъикъхэм), Iащэ А. (я 90 — рэ такъикъхэм), Н. Каверин (я 90+ такъикъхэм).«Кызылташ» хэтыгъэхэр: Жигайлов (къэлэпчъэIут), Габуев (Дзень), Масленников, Лукиных (Луториев), Рамазанов, Оболенцев (Зинченко), Маргиев, Хашматулла, Мемешев (Петренко), Елесин (Каверин), Забун. Тренер шъхьаIэр: Геннадий Орбу. ФК «Зэкъошныгъэм» щыджэгугъэхэр: Хачиров (къэлэпчъэIут), Кобж (Шустов), Солоп, Васильев, Юшко (Iащэ), Цанава, Черджиев, Блэгъожъ (ХъуакIо), Кобл (Едыдж), Къуанэ (Хьэхыр), Делэкъо. Тренер шъхьаIэр: Александр Кайванов.Бахчисарай и «Кызылташ» зы чIыпIэкIэ «Зэкъошныгъэм» ыуж къинэщтыгъ. Апэрэ едзыгъом къыщегъэжьагъэу зэфэдэ джэгукIэ командитIуми къагъэлъагъощтыгъ. Я 24-рэ такъикъым тиспортсменхэм пчъагъэр къызэIуахыгъ. Мыщ ыуж бысымхэм яешIакIэ нахь агъэлъэшыгъ, арэу щытми, пчъагъэр зэмыхъокIэу зыгъэпсэфыгъо уахътэм кIуагъэх. ЯтIонэрэ едзыгъом такъикъ заулэ пыкIыгъэу «Кызылташ» хэт Александр Оболенцевым пчъагъэр 1:1-м нигъэсыгъ. Джыри я 76-рэ такъикъхэм бысымхэр зы IэгуаокIэ къыхэщыгъэх. ЗэIукIэгъу уахътэр аухыгъэу, судьям къыхигъэхъогъэ уахътэр «Зэкъошныгъэм» къызфигъэфедагъ. Футбол шъофым зэблэхъуныгъэкIэ къихьэгъэ Iащэ Анзор пчъагъэр 2:2 ышIыжьыгъ. Ау зэфэдэ кIэух мыщ фэхъугъэп. Зы такъикъкIэ «Кызылташ» хэт Никита Кавериным пчъагъэр 3:2-м нигъэси, икомандэ текIоныгъэ къыфихьыгъ.Мы ешIэгъум ыуж «Зэкъошныгъэр» ятфэнэрэ чIыпIэм уцугъэ, «Кызылташ» яплIэнэрэм дэкIоягъ. «Севастополым» пэрытныгъэр ыIыгъ. «Шахтерымрэ» «Ростов-2»-мрэ ащ ыуж къенэх.Непэ, пчыхьэм сыхьатыр хым, «Зэкъошныгъэр» Мыекъуапэ щыIукIэщт командэу «Рубин Ялтэ».