Бзаго Рустам: «Спортыр сигъашI»

Спорт. Зы гущыI, ау цIыфэу пылъымкIэ мэхьа­нэу иIэр зэфэшъхьаф. Зыхэм апкъышъол тIэкIу запсыхьэкIэ рагъэкъу. Адрэхэм ящыIэныгъэ рапхы, спортсмен бэлахьэ, тренер мэхъух.

Спортым фэщагъэу, ащ имэхьанэ цIыфхэм алъагъэIэсыным, зырагъэушъомбгъуным пылъыри макIэп. Ахэм ащыщых спорт журналистхэр. Непэ ахэм я Дунэе маф. АдыгеимкIэ спорт журналист шъыпкъэу джырэ уахътэм тиIэр Бзаго Рустам. Мы мафэм ехъулIэу ащ зэдэгущыIэгъу дэтшIыгъ.Рустам ицIыкIугъом щегъэжьагъэу ятэ ихьатыркIэ спортым фэщагъэу къэтэджыгъ. Адыгэ къэралыгъо университетым филологиемкIэ ифакультет щеджэ зэхъуми ар чIидзыгъэп.— Апшъэрэ еджапIэм ичIыунэ Iэнэшъхьэ теннис щешIэхэу чIыпIэ иIагъ. Джащ тхьамафэм щэ сыкIоти, сыджэгущтыгъэ. Мы спорт лъэпкъым шIулъэгъоу фысиIэр ащ къыщежьагъ, — еIо Рустам.Университетыр къызеухым, къэ­ралыгъо телерадиокомпаниеу «Адыгеим» щылэжьэнэу ригъэ­жьагъ. Спортым фэгъэхьыгъэ къэ­барэу къатыхэрэми ахэхъуагъ, къэтын зэфэшъхьафхэр къыдигъэ­кIыхэу Рустам ригъэжьагъ, джы къызнэсыгъэми а Iофыри егъэцакIэ.

ЗэдэгущыIэгъур дгъэхьазырынэу Бзаго Рустам къэлэ паркым тыщыIукIагъэу волейболымкIэ командэм хэт спортсменкэхэр къыблэкIыгъэх. ШъхьэкIэфэныгъэ хэлъэу Рустам сэлам къырахыгъ. Ары, гъогум рыкIоми, сыд фэдэ спорт Iофтхьабзэ щыIэми, журналистыр къашIэжьы. Къэтын зэфэшъхьафхэр илъэс 15-м зэригъэхьазырыщтыгъэм изакъоп, цIыфхэр спортым фэщэгъэнхэм фэшI Iофтхьэбзэ зэмылIэужы­гъохэр Рустам къеугупшысых, спортымкIэ къэлэ комитетым щы­лэжьэнэу зыригъэжьагъэм къыщыублагъэуи ахэр зэхещэ.Джыдэдэм Рустам тигъэзет икорреспондентэу мэлажьэ, Iэнэшъхьэ теннисымкIэ тренер, къэлэ спорт комитетым иметодист. 2018-рэ илъэсым къыщегъэжьагъэу гандболымкIэ командэу «АКъУ-Адыифым» иджэгунхэр зэнкIэ зэпхыныгъэм тетэу къеIуа­тэх. ФутболымкIэ Абрамовым и Кубок икъыдэхынкIэ зэIукIэгъухэ­ри мыщ фэдэ шIыкIэу мыгъэ къыгъэкъэбарыгъэх.— Сыфай спорт журналистхэр тиIэнхэу. Ар зышIогъэшIэгъон ныбжьыкIэхэм къахэкIыгъагъэмэ, зэрэсфэлъэкIэуи садэIэпыIэщтыгъ. Адыгеир сыдигъокIи спорт рес­публикэу алъытэщтыгъ, ащ фэлэжьэщт журналистхэри тиIэнхэ фае, — еIо сигущыIэгъу.— Сыда ахэр зыкIытимыIэхэу плъытэрэр?— Адыгеим зэнэкъокъу зэфэшъхьафыбэ щызэхащэ. ЗэнкIэ зэпхыныгъэм тет къэIотэнри тищыIэныгъэ къыхэхьагъ. Ау а Iофыр агъэцэкIэнэу нахь зэлъашIэрэ комментаторхэр, гущыIэм пае, Матч ТВ-м къыращыхэшъ, респуб­ликэм къырагъэблагъэх. Зыпари пылъэп тэ ащ фэдэхэр зэрэтимыIэхэм. Мары программэ зэфэшъхьафхэр спортым ылъэныкъокIи нэмыкIхэмкIи мэлажьэх. Ахэм афэдэу, пшъэрылъ зыфэбгъэуцужьынышъ, спортыр шIу зылъэгъухэу, журналистэу еджэ зышIоигъо ныбжьыкIэхэр къепщэлIэнхэ, егъэджэн сыхьатхэр афызэхэпщэнхэ фаеу сэлъытэ.— Рустам, сыд фэдэрэ спорт лъэпкъ зыфэдгъэзагъэми, ащ пылъ шапхъэ­хэм, тиспортсменхэм ягъэхъагъэхэм уащыгъуаз. Сыдэущтэу мы зэкIэри пшъхьэ къинэра?— Сыд фэдэрэ Iоф бгъэца­кIэми, угу етыгъэу пшIэн фае. Спортыр сэ сиIоф къодыеп, сищыIэныгъ. СищысэтехыпIэщты­гъэх ЕмтIылъ Нурбый, КIыкI Ибрахьим. Спортым ахэр фэшъыпкъэ дэдагъэх. Аущтэу щымытэуи журналист дэгъу ухъущтэп. ДжырэкIэ дунэе хъытыури щыI, зэкIэ спорт еджапIэхэм нэкIубгъохэри къащызэ­Iуахыгъэх. Ау къэбарэу къарагъа­хьэрэр мэкIэ дэд.Рустам ицIыкIугъом щегъэжьагъэу тренерэу лэжьэнэу фэягъ.— ФутболымкIэ тренерэу ары зызэрэслъэгъущтыгъэр. Командэ лъэш дэдэ сиIэу, зэнэкъокъу дэгъухэм тахэлажьэу къызшIозгъэшIыщтыгъ, — еIо ащ.ЗыкIэхъопсыщтыгъэр ыгъэцэ­кIагъ пIоми хъущт. Iэнэшъхьэ тен­нисымкIэ ар тренер хъугъэ. Джыдэдэм нэбгырэ 46-м ехъу егъасэ.ЗэдэгущыIэгъур окIофэ Рустам заулэрэ къыхигъэщыгъ спортыр ищыIэныгъэу зэрэщытыр. Ар гущыIэ къодыеп. Тренерым сабыищ иI. Нахьыжъхэу Дамиррэ Дари­нэрэ Iэнэшъхьэ теннисым пы­лъых. Республикэм изэIухыгъэ зэнэкъо­къоу Мыекъуапэ щыкIуагъэхэми текIоныгъэхэр къащахьыгъэх. Къыблэ федеральнэ шъолъыр зэнэкъокъуми Адыгеим ихэшыпыкIыгъэ куп хэтхэу хагъэунэфыкIырэ чIыпIэхэр къыщыдахыгъэх. Илъэсищым щегъэжьагъэу ятэ игъу­сэу спорзалым макIо анахьыкIэ дэдэу Асхьади. Ежь Рустам исабый къодыехэр арэп гъэхъагъэхэр зышIыхэрэр. Адыгеим изэ­Iухыгъэ зэнэкъокъоу блэкIыгъэ илъэсым щыIагъэм ныбжьым елъытыгъэу купи 8-у хэлэжьагъэ­хэр гощыгъагъэхэмэ, 7-мкIэ Рус­там ыгъасэхэрэр апшъэ хъугъэх.— Журналистэу сылажьэ зэ­хъум, тренерхэм бэрэ гущыIэгъу сафэхъущтыгъ. Ащ дэжьым тэрэз дэдэу къызгурыIощтыгъэп тренерым къарыоу иIофшIэн хилъхьэщтыгъэр. Сабыир спортзалым къычIэхьэ, уахътэ текIы, чемпион мэхъу — ары зымышIэрэмэ зэралъэгъурэр. Джы сэ зэхэсшIагъ ащ къарыоу рахьылIэщтыгъэр зыфэдизыр, — еIо Рустам.— АР-м и ЛIышъхьэу ­КъумпIыл Мурат игукъэ­кIыкIэ мары къэлэ зыгъэ­псэфыпIэ паркым Iэнэ­шъхьэ теннисым тегъэ­псыхьэгъэ чIыпIи къыщызэIуахыгъ. «Мэздахэми» ахэр ащагъэуцугъэх. Мы спорт лъэпкъым зеу­шъомбгъоу олъыта?— Мы чIыпIэхэр дэгъух. Уфаемэ щагум, спортзалым защыбгъэ­хьазырын плъэкIыщт. Мы спорт лъэпкъыр зикIасэхэри щыджэгушъущтых. Iэнэшъхьэ теннисым фэщагъэу тиIэр макIэп. Ау щыкIагъэхэри тиIэх. ГущыIэм пае, зэнэкъокъухэм тарыкIошъунэу тэ къытэпхыгъэ автобус тиIагъэмэ, ишIуагъэ къакIощтыгъэ.— Рустам, мыщ фэдиз Iофыр зэшIоохы. О спортым упылъынэу уахътэ къыхэкIыжьа?— Спортым упылъынэу зебгъажьэкIэ, ау сыдми ар пфэгъэтIылъыжьыщтэп. Уахътэ сиIэ зы­хъукIэ шэмбэт пчэдыжьырэ футболым иветеранхэм сахэтэу сэджэгу, шахмат компьютеркIэ сешIэнэу сикIас. Пцэжъыеешэнри хэсынэрэп. Сиунагъо сигъусэу чылэм сэкIо. Сабыйхэри пцэ­жъыеешэным фэзгъэсагъэх. Ахэм цIыфыгъэ, Iэдэб ахэлъэу, тэрэзэу спIунхэр пшъэрылъ шъхьаIэу зы­фэсэгъэуцужьы.— ФутболымкIэ Дунэе чемпионатым сыд фэдэ къэралыгъуа зыхьынэу ­къыпшIошIырэр?— Францием текIоныгъэ къыдихынэу сэлъытэ.Бзаго Рустам испортивнэ гу­лъытэныгъэ къэшъыпкъэжьыщтмэ къэлъэгъощт.Цэй Замир.