А. Гусев
Партием изэфэс иапэрэ чэзыу Москва щыкIуагъ. Урысые Федерацием и Президентэу Владимир Путиным ар къызэIуихыгъ. Зэфэсым ипленарнэ зэхэсыгъо ыкIи партием и Апшъэрэ советрэ и Генеральнэ советрэ язэхэсыгъо зэрищагъ «Единэ Россием» и Тхьаматэу Дмитрий Медведевым. Зэфэсым иIофшIэн хэлэжьагъэх партием иапшъэрэ пащэхэр, УФ-м и Правительствэ хэтхэр, хэгъэгум ишъолъыр пстэуми ялIыкIохэр, япащэхэр, Къэралыгъо Думэм идепутатхэр, ФедерациемкIэ Советым хэтхэр, общественнэ IофышIэхэр.Партиеу «Единэ Россием» и Адыгэ шъолъыр къутамэ и Секретарэу, партием и Апшъэрэ совет хэтэу,республикэм и ЛIышъхьэу КъумпIыл Мурат Адыгеим илIыкIохэм япэщагъ.
Адыгеим икIыгъэ лIыкIохэм ахэтыгъэх партием пэшIорыгъэшъ мэкъэтынэу иIагъэм текIоныгъэ къыщыдэзыхыгъэ, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, партием и Генеральнэ совет хэтэу Надежда Бражниковар, партием ишъолъыр гъэцэкIэкIо комитет ипащэу АфэшIэгъо Рэмэзан, муниципальнэ образованиеу «Къалэу МыекъуапэкIэ» партием ичIыпIэ къутамэ исекретарэу Геннадий Митрофановыр, ассоциациеу «Адыгэ Республикэм имуниципальнэ образованиехэм я Совет» итхьаматэу Апсалямэ Руслъан, республикэм ирайон пстэуми яIофышIэ чанхэм ащыщхэр.Зэфэсым джащ фэдэу къекIолIагъэх Адыгеим илIыкIохэу ФедерациемкIэ Советым ыкIи Къэралыгъо Думэм ахэтхэу Александр Наролиныр, Хъопсэрыкъо Мурат, Владислав Резник, Хьасанэкъо Мурат. Зэфэсым щатегущыIагъэх партием ипшъэрылъ шъхьаIэхэм, Народнэ программэр илъэси 5-м къыкIоцI гъэцэкIагъэ зэрэхъугъэм икIэуххэри щызэфахьысыжьыгъэх, я IX-рэ зэIугъэкIэгъумкIэ Къэралыгъо Думэм идепутатхэм яхэдзынхэу щыIэщтхэм партием ыцIэкIэ якандидатхэм яспискэхэр ащ щаухэсыгъэх. Iоныгъом 18-м къыщегъэжьагъэу и 20-м нэс мэкъэтыныр кIощт. Ащ дакIоу шъолъыр 39-мэ яхэбзэгъэуцу зэIукIэхэм яхэдзынхэр щыIэщтых, Адыгэ Республикэм и Къэралыгъо Совет — Хасэм ихэдзынхэри зэрахэтхэу.Пленарнэ зэхэсыгъом УФ-м и Президентэу Владимир Путиным къызэрэщыхигъэщыгъэмкIэ, мы илъэсым партиеу «Единэ Россием» июбилей — зызэхащагъэр илъэс 25-рэ зэрэхъурэр хегъэунэфыкIы, пшъэрылъ шъхьаIэу иIагъэм — Хэгъэгумрэ цIыфхэмрэ афэлэжьэныр ыгъэцэкIагъ ыкIи ащ фэшъыпкъэу къэнэжьы.
«Iо хэлъэп, — къыIуагъ Владимир Путиным, — непэ къиныгъоу къыкъокIыхэрэр щыдгъэзыешъущтых, терроризмэм епхыгъэ бзэджэшIагъэу тихэгъэгу щызэрахьэхэрэм, инфраструктурэм зэрарэу рахырэм ямылъытыгъэу. Хэгъэгу кIоцI Iофыгъохэри зэшIотхыщтых».Къэралыгъом социальнэ пшъэрылъхэр зэкIэ зэригъэцэкIэщтхэмкIэ, хэхъоныгъэм ипрограммэхэу стратегическэ мэхьанэ зиIэхэр зэкIэ пхырыщыгъэ зэрэхъущтхэмкIэ къэралыгъом и Пащэ къыгъэгугъагъэх.УФ-м и Президент партиеу «Единэ Россиер» кIэщакIо зыфэхъугъэ Iофтхьабзэхэр къыгъэнэфагъэх ыкIи ахэм мэхьанэу яIэр къыхигъэщыгъ. Мы лъэныкъомкIэ анахьэу анаIэ зытыраригъэдзагъэхэм ащыщых хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ ящыкIэгъэ IэпыIэгъур ятыгъэныр, социальнэ ыкIи экономикэ проектышхохэм япхырыщын зэкIэми яIахь хашIыхьан зэрэфаер. А пстэуми анэмыкIэу шъолъырхэм мылъку IэпыIэгъу араты хъугъэ, бэмышIэу унашъо аштагъ бюджет чIыфэу ахэм ателъхэмкIэ пIалъэр афызэкIахьанэу. Владимир Путиным джыри зы лъэныкъо дыригъэштагъ — кIэлэегъаджэм хэгъэгум мэхьанэу щыриIэр, ащ истатус икъоу гъэнэфэгъэныр. КIэлэегъаджэхэм яIэпэIэсэныгъэ джыри нахь хагъэхъонымкIэ амалыкIэу, IэпыIэгъу тедзэу аратыщтхэр ары ар зыфэгъэхьыгъэр. Партием итхьаматэу Дмитрий Медведевыр къызэгущыIэм къызэрэхигъэщыгъэмкIэ, «Единэ Россием» илъэс 25-рэ хъугъэу пэщэныгъэ ыIыгъын зыкIилъэкIырэр цIыфхэм ягумэкIыгъохэр зэхишIыкIын, анахь осэшхо зэратырэ, анахь агъэлъэпIэрэ хэбзэ-зэхэтыкIэхэр къыдилъытэхэзэ цIыфхэр зэкъуигъэуцон зэрилъэкIырэр ары.
«Мы илъэситфэу къызэтынэкIыгъэр ушэтыпIэ ин дэдэу тэркIэ щытыгъ. ЗэкIэми хэгъэгум, тицIыфхэм тырягъусагъ ыкIи шъыпкъэныгъэ хэлъэу типшъэрылъ дгъэцэкIагъэ. Джы теубытэгъэ пытэ зыфытиIэр джырэ тарихъым ичэзыу анахь къинхэм зыкIэ ащыщым IофшIэныр тыкъызэкIэмыкIоу лъыдгъэкIотэныр ары», — къыхигъэщыгъ партиеу «Единэ Россием» и Тхьаматэ.Адыгеим и ЛIышъхьэ зэфэсым зэрэхэлэжьагъэм икIэуххэр къызэфихьысыжьхэзэ зэрэхигъэунэфыкIыгъэмкIэ, УФ-м и Президентрэ партием и Тхьаматэрэ къагъэнэфэгъэ пшъэрылъхэмрэ унашъоу аштагъэхэмрэ мэхьанэшхо яI. Партием ишъолъыр къутамэ ипащэхэм шъолъыр ыкIи федеральнэ пшъэрылъхэр гъэцэкIагъэ зэрэхъухэрэм иуплъэкIун ренэу зэхэщэгъэным иамал къаты.«Партиеу «Единэ Россием» пэщэныгъэ зезыхьэрэ партием истатус къызэрилэжьыгъэм Владимир Путиным осэшхо къыфишIыгъ ыкIи пшъэдэкIыжь инэу ар ылъытагъ. Адыгеими партием ипшъэрылъ шъхьаIэхэр зэрэпхырищыщтхэм ынаIэ тырегъэты. ТапэкIи партиер политическэ кIочIэ пащэу зэрэщытыр гъэпытэгъэным тиIахь хэтшIыхьаным тэри тыфэхьазыр. Адыгеим тапэкIи хэхъоныгъэ зэришIыщтым епхыгъэ гухэлъыбэ тиI. ЗэкIэлъыкIокIэ гъэнэфагъэ иIэу ахэр щыIэныгъэм щыпхырытщыщтых. Хэгъэгум ипащэхэми ащкIэ яшIуагъэ къытэкIыщт. IофшIэнымкIэ анахь мэхьанэ зиIэр, къэралыгъом ипащэ къызэриIуагъэу, цIыфхэм яеплъыкIэхэм такъыпкъырыкIыныр, цыхьэ бгъуитIумкIи зэфэтшIыжьыныр ары», — къыхигъэщыгъ АР-м и ЛIышъхьэ.Зэфэсым къыщаIэтыгъэ Iофыгъохэр, пшъэрылъхэр зэкIэ щыIэныгъэм щыпхырыщыгъэнхэм республикэм исхэмакIуачIэ рахьылIэщт, ахэм зыкIэ ащыщ илъэсым иполитическэ хъугъэ-шIагъэу щыIэщтым — УФ-м и Къэралыгъо Думэ ыкIи АР-м и Къэралыгъо Совет — Хасэм яхэдзынхэм языфэгъэхьазырын. Хэбзэгъэуцугъэм диштэу ыкIи щынэгъончъэу хэдзынхэр рекIокIынхэмкIэ ищыкIагъэр зэкIэ шIэгъэн зэрэфаем республикэм и ЛIышъхьэ анаIэ тыраригъэдзагъ.Зэфэсым иятIонэрэ чэзыу шышъхьэIум щыIэщт. Ащ партиер хэдзынхэм къызэрякIолIэщт Народнэ программэм икIэух тедзэгъу щаштэщт.Адыгэ Республикэм и ЛIышъхьэипресс-къулыкъукъытырэ къэбархэмкIэТхьаркъохъо Сафыет.