ЩыIэх цIыфхэу зищыIэныгъэ щысэтехыпIэхэр, щыIэх цIыфхэу зыцIэ тамыгъэ хъухэрэр. Ахэм ащыщ хэушъхьафыкIыгъэ дзэ операцием ипшъэрылъхэр щигъэцакIэхэзэ хэкIодэгъэ ХьакIэкъожъ Мурат. Ащ ишIэжь фэгъэхьыгъэ зэнэкъокъу каратэмкIэ Мыекъуапэ щыкIуагъ.
Адыгэ Республикэм ыкIи Краснодар краим къарыкIыгъэ спортсмен ныбжьыкIэ 90-рэ фэдиз Iофтхьабзэм зэрищэлIагъэх. Ахэр текIоныгъэм фэбэнэнхэ закъор арэп япшъэрылъыгъэр, лIыхъужъэу зищыIэныгъэ ныбжьыкIэхэм япIун-гъэсэныгъэ фэзгъэхьыгъэм ишIэжь агъэлъэпIэныр ары. Зэнэкъокъум къеблэгъагъэх Къэралыгъо фондэу «Хэгъэугм ихъумакIохэр» зыфиIорэм ишъолъыр къутамэ ипащэу ПIатIыкъо Аслъан, зыпсэ зыгъэтIылъыгъэ дзэкIолIым ишъхьэгъусэ, икIэлэцIыкIухэр, езгъэджагъэхэр, иныбджэгъухэр, унагъом ынаIэ тезыгъэтырэ социальнэ гъэIорышIакIоу Шъхьафыжь Дианэ.
Шъолъыр фондым ипащэу ПIатIыкъо Аслъан къэзэрэугъоигъэхэм шIуфэс гущыIэхэмкIэ закъыфигъэзагъ. ТилIыхъужъхэм яшIэжь къызэтегъэнэгъэным ыкIи Хэгъэгум фэшъыпкъэхэу къулыкъу фахьыным имэхьанэ тиныбжьыкIэхэм алъыгъэIэсыгъэныр зэряпшъэрылъыр къыхигъэщыгъ.
Зэнэкъокъум гъэхъагъэ щызышIыгъэхэм кубокхэр ыкIи бгъэхалъхьэхэр афагъэшъошагъэх.