Ацумыжъ Адам
Адыгеим илIыкIо куп Марокко щыI. Урысыем и Мафэ ыкIи Урысые Федерациемрэ Пачъыхьагъоу Мароккэрэ игъэкIотыгъэу зызэдэлажьэхэрэр илъэсипшI зэрэхъугъэм афэгъэхьыгъэ Iофтхьабзэхэм ахэлажьэ.
АР-м культурэмкIэ иминистрэу Аулъэ Юрэ Марокко иадминистративнэ хэкоу Сус-Масса (къэлэ шъхьаIэр Агадир) игубернаторэу Саид Амзази IофшIэгъу зэIукIэгъу дыриIагъ. ХьакIэпэгъокIынымкIэ шэн-хэбзэ байхэр зиIэ Марокко ыкIи адыгэ культурэхэр мы Iофтхьабзэм зэфищагъэх.Агадир зэIукIапIэу къызэрэхахыгъэм мэхьанэ гъэнэфагъэ зэриIэр Саид Амзази хигъэунэфыкIыгъ. Непэрэ зекIонымрэ лIэшIэгъу пчъагъэхэм къапхырыкIырэ хьакIэпэгъокIынымрэ зыщызэдиштэрэ гупчэу ар щыт.— Адыгэ Республикэм къикIыгъэ лIыкIо купыр тхьакIэныр тэркIэ шъуашэ. Тишъолъыр щыпсэухэрэр цIыф зэIухыгъэх, шэн-хабзэхэм лъытэныгъэ афашIы, тицIыф лъэпкъхэм хьакIэр агъэлъапIэ, — бысымым шIуфэс гущыIэхэр Адыгеим илIыкIохэм афигъэзагъ.АР-м и ЛIышъхьэу КъумпIыл Мурат ыцIэкIэ Аулъэ Юрэ сэлам фабэ къапэгъокIыгъэхэм арихыжьыгъ. Адыгэ хабзэмрэ Марокко щыпсэурэ цIыфхэм яшэн-хабзэхэмрэ бэкIэ зэрэзэтефэхэрэр игуапэу хигъэунэфыкIыгъ.АР-м и ЛIышъхьэ IэкIыб зэпхыныгъэхэмкIэ ыкIи инвестиционнэ политикэмкIэ иIэпыIэгъоу Хьакъунэ Бэллэ зэIукIэгъум хэлэжьагъ. Культурэм нэмыкIэу инвестиционнэ лъэныкъомкIи язэпхыныгъэ шIуагъэу къытын ылъэкIыщтхэм, зекIоным, агропромышленнэ ыкIи нэмыкI лъэныкъуабэхэмкIэ зэрэзэдэлэжьэнхэ алъэкIыщтхэм зэIукIэгъум щатегущыIагъэх.УФ-м и Посольствэу Марокко щыIэмрэ АР-м культурэмкIэ и Министерствэрэ лъэныкъуитIум язэхахьэ зыфэдэщтыр агъэнэфагъ.АР-м лъэпкъ орэдымкIэ ыкIи къашъомкIэ и Къэралыгъо ансамблэу «Ислъамыем», УФ-м лъэпкъ творчествэмкIэ изаслуженнэ фольклор-этнографическэ купэу «Ащэмэзым» яартистхэр зыхэхьэгъэхэ къэгъэлъэгъоным, КъТРК-у «Адыгеим» ипащэу Ацумыжъ Адам идокументальнэ фильмэу «Хранители культуры» бысымхэм осэшхо афашIыгъ.ЛъэныкъуабэхэмкIэ зэдэлэжьэнхэу, концертхэр, музей къэгъэлъэгъонхэр зэхащэхэзэ ашIынхэу зэIукIэгъум щызэдаштагъ.— Урысыемрэ Мароккэрэ зэрэзэдэлажьэхэрэм диштэу культурнэ лъэмыджэу тишъолъырхэм азыфагу щыдгъэпсырэм ылъачIэ непэрэ зэIукIэгъум щыдгъэпытагъ. Ащ мэхьанэшхо иI ыкIи тапэкIэ гугъэпIэшIухэр етэпхых, — къызэфихьысыжьыгъ Аулъэ Юрэ.Адыгеим илIыкIо куп мэкъуогъум и 18-м нэс Марокко щыIэщт. Къалэхэу Марракеш, Агадир, Рабат ащыкIорэ культурнэ Iофтхьэбзэ инхэм ахэлэжьэщт.Тэу З.