Е. Дьячковам ихъарзынэщ
Партиеу «Единэ Россием» ипрограммэу «Унэгъо пытэр» зыфиIорэр 2017-рэ илъэсым къыщегъэжьагъэу Адыгеим щэлажьэ.
Ныгъом, сабыигъом, унэгъо Iужъухэм IэпыIэгъу ягъэгъотыгъэным ар афэгъэзагъ. Ащ къыдыхэлъытэгъэ екIолIакIэхэр хабзэм иIофышIэхэм, общественнэ зэхахьэхэм агъэфедэзэ унагъом имэхьанэ агъэпытэныр япшъэрылъ шъхьаI ыкIи проектым ишъолъыр гъэIорышIакIоу, Къэралыгъо Совет — Хасэм идепутатэу Евгения Дьячковам къызэриIуагъэмкIэ, Iофтхьабзэу рагъэкIокIыгъэр макIэп.— Илъэс къэс цифрэ шIыкIэм тетэу мэфэ гъэнэфагъэхэм атефэу цIыфхэм яеплъыкIэхэр упчIэн шIыкIэм тетэу тэугъоих. Ащ ишIуагъэкIэ тиIофшIэн къызэлъиубытэрэ гумэкIыгъохэм зядгъэушъомбгъун тэлъэкIы, сабый зиIэ унагъохэм ящыIакIэ нахьышIу шIыгъэнымкIэ ны-тыхэм яеплъыкIэхэр зэтэгъэшIэшъух, — къыхигъэщыгъ ащ.ШIэныгъэгъозэ Iофтхьабзэхэр дунэе хъытыум зэрэщырагъэкIокIыхэрэм фэшъхьафэу, зэIукIэхэри зэхащэх. ГущыIэм пае, блэкIыгъэ илъэсым урысыбзэм, ветеранхэм ямафэхэм яхъулIэу, кIэлэеджэкIо нахьыжъхэм, сэнэхьат зэзыгъэгъотыхэрэм партием ипроект игъэцэкIэн фэгъэзагъэхэр аIукIагъэх, егъэджэнхэр, Iэнэ хъураехэр афызэхащагъэх, шъолъырым ицIыф цIэрыIохэм, гъэшIэгъонхэм нэIуасэ афэхъугъэх.Унагъом, ныгъом ыкIи сабыигъом ямэхьанэ гъэпытэгъэнымкIэ проект гъэшIэгъонэу программэм къыдыхэлъытагъэу рагъэкIокIырэмэ ащыщ «Зэрэунагъоу зыгъэпсэфыгъом» зыфиIорэр. Къэралыгъом икъулыкъу зэфэшъхьафхэм язэхэсыгъоу 2022-рэ илъэсым рекIокIыгъэм Евгения Дьячковам ащ лъэтегъэуцо щыфишIыгъ ыкIи Урысыем ишъолъыр пстэуми ар щагъэфедэмэ хъунэу щалъытагъ.— Сыд фэдэрэ проекти дэгъоу Iоф ышIэным ылъапсэр къулыкъу зэфэшъхьафхэм язэдэлэжьэныгъ, арышъ, къэралыгъо проектэу «Единэ Россием ибзылъфыгъэ движение» зыфиIорэм изы лъэныкъоу «Бзылъфыгъэм ымакъэм» иIофышIэ куп программэу «Унэгъо пытэм» хэлажьэ. УпчIэ шъхьаIэу зытегущыIагъэхэм ащыщ сабыим игъэкIодыжьынкIэ пIалъэхэм ягъэнэфэн, апэрэу сабый зышъо хэфагъэхэм агъэкIодыжьы зэрэмыхъущтым, ХэушъхьафыкIыгъэ дзэ операцием хэлэжьагъэхэр щыIэныгъэм хэгъэгъозэжьыгъэнхэм ыкIи IофшIэпIэ чIыпIэхэр ягъэгъотыгъэнхэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэр, — къыIуагъ программэм ишъолъыр гъэIорышIакIо.«Унэгъо пытэм» илIыкIохэр хэмылажьэхэу унагъом, сабыигъом афэгъэхьыгъэ Iофтхьабзэ республикэм щырекIокIырэп. Унагъом, шIулъэгъум, шъыпкъагъэм я Мафэ, илъэсипшI пчъагъэхэр къызэдэзыгъэшIэгъэ зэшъхьэгъусэхэм ямэфэкIхэр, ныбжьыкIэхэм, ным ямафэхэр, тарихъ мэхьанэ зиIэ мэфэкIхэр ыкIи нэмыкIхэр проектым иIофшIэн щыщых. Ахэм адакIоу АР-м и ЛIышъхьэ иунашъохэм ягъэцэкIэн зэрэкIорэм программэм Iоф дэзышIэхэрэм гъунэ лъафы. Ащ къыдыхэлъытагъэу къэралыгъо проектэу «Унэгъо пытэр» зыфиIорэм ишъолъыр гъэIорышIакIоу Евгения Дьячковар «Единэ Россием» иобщественнэ штаб илIыкIохэм ягъусэу Кощхьэблэ районым мэлылъфэгъум дэкIыгъо щыриIагъ. Бзылъфыгъэу ыкIи кIэлэцIыкIоу чIыпIэ къин ифагъэхэм IэпыIэгъу ягъэкIыгъэнымкIэ гупчэу Натырбые дэтыр, зэгъэшIужь унэу «Зеленая комната» зыфиIоу Кощхьаблэ къыщызэIуахыгъэр зэрагъэлъэгъугъэх. Мыщ фэдэ гупчэхэм яIофшIэн нахьышIу шIыгъэнымкIэ амалышIу хъущт екIолIакIэу ахэм ащылажьэхэрэм къыхагъэщыгъэхэр хэбзэгъэуцу гукъэкIэу федеральнэ гупчэм агъэхьыщтхэм алъапсэ хъугъэх.Евгения Дьячковам къызэриIуагъэмкIэ, проектым игъэцэкIэнкIэ Iофыбэ ыпэ илъ. Ау ахэм зэкIэм пшъэрылъ шъхьаIэу яIэр кIэлэцIыкIухэр зиIэ унагъохэм ящыIэныгъэ нахьышIу шIыгъэныр, хэбзэгъэуцу ыкIи гъэцэкIэкIо хэбзэ къулыкъухэм акIочIэ зэхэлъкIэ унагъом имэхьанэ республикэм щыгъэпытэгъэныр ыкIи ащ пылъ шэн-хабзэхэр къыщызэтегъэнэгъэнхэр ары.
Анцокъо Ирин.