Адыгеим ихэбзэ къулыкъухэм япащэхэм бензин цIыфхэм зэраIэкIагъахьэрэмкIэ Iофхэм язытет гъунэ лъафы. Адыгэ Республикэм экономикэ хэхъоныгъэмрэ сатыумрэкIэ и Министерствэ къызэритыгъэмкIэ, чIыдагъэм хэшIыкIыгъэхэмкIэ IэпэчIэгъанэу республикэм иIэр зэрагъашIэ зэпыт.
— Мотор гъэстыныпхъэр IузыгъэкIыхэрэм къызэраIорэмкIэ, чIыдагъэм хэшIыкIыгъэхэр зэпыу имыIэу республикэм къыIэкIэхьащтых. Автотранспорт зиIэхэм ящыкIагъэм ехъоу гъэстыныпхъэр къаIахыным зыщадзыенэу тялъэIу. Шапхъэу щыIэхэм адиштэу гъэстыныпхъэр абтомобиль бакхэм афарагъахъо, ау канистрэхэм ар пIалъэ горэкIэ афырагъэхъощтэп, — къытыгъ Адыгэ Республикэм экономикэ хэхъоныгъэмрэ сатыумрэкIэ и Министерствэ.Специалистхэр Адыгеим щыпсэухэрэмрэ ихьакIэхэмрэ ялъэIух самбырынхэу, официальнэ къэбархэм анэмыкIхэм арымыгъозэнхэу, чэзыухэр къамыгъэхъунэу.— ЩэIагъэ къызыхэжъугъэфэнэу, лъэныкъо пстэури зэпэшъущэчызэ мы Iофым шъукъекIолIэнэу, бензинымрэ дизельнэ гъэстыныпхъэмрэ ауасэ зэрэдафыягъэр зыгорэхэм къызэрэзфагъэфедэрэр къыжъугурыIонэу, Iофхэм язытет нахь дэй мыхъуным шъупылъынэу тыкъышъоджэ, — къытыгъ Адыгэ Республикэм экономикэ хэхъоныгъэмрэ сатыумрэкIэ и Министерствэ.