Е. Абатуровым ихъарзынэщ
Дзэ пшъэрылъхэр бгъэцэкIэнхэр псынкIагъоп, ащ щынагъуи хэлъ, лIыгъи ищыкIагъ. А лъэбэкъур зышIыгъэ кIалэхэм лъытэныгъэрэ щытхъурэ къалэжьыгъ.
Евгений Абатуровыр къэралыгъо къулыкъум ищыIэныгъэ фигъэхьыгъ. Хэгъэгу кIоцI IофхэмкIэ къулыкъухэм исэнэхьат гъогу ащыригъажьи, Урысые гвардием исатырхэм ащылъигъэкIотагъ. ХэушъхьафыкIыгъэ дзэ операцием идзэ пшъэрылъхэр щигъэцакIэхэзэ, 2023-рэ илъэсым уIэгъэ хьылъэ къытыращагъ.Евгений гурыт еджапIэм ыуж Мыекъопэ къэралыгъо политехническэ колледжым щеджагъ. Нэужым дзэм ащи, Буденновскэ ишхончэо бригадэу N 205-м шхончаоу къулыкъур щихьыгъ. 2012-рэ илъэсым къыщегъэжьагъэу 2016-рэ илъэсым нэс хэгъэгу кIоцI къулыкъум иавиационнэ хэушъхьафыкIыгъэ отряд хэтэу Iоф ышIагъ. Нэужым, 2016-рэ илъэсым Росгвардием и ГъэIорышIапIэу АР-м щыIэм къащэжьи, 2025-рэ илъэсым нэс ащ къулыкъур щихьыгъ.2022-рэ илъэсым хэушъхьафыкIыгъэ дзэ операциер къызежьэм, Росгвардием иотряд хэтэу, икомандир игъусэу къулыкъум кIуагъэ.
Унагъо пэпчъ Хэгъэгум къулыкъу зэрэфихьыгъэм тарихъ шъхьаф пылъ. Евгений Абатуровым мыр ошIэ-дэмышIэу къыхихыгъэп. А лъагъор ежь ыпэкIэ бэшIагъэу яунагъо щыпхырыщыгъэу щытыгъ. КIэлэ ныбжьыкIэм щысэшIу фэхъугъэхэр ятэжъ пIашъэхэр ары. Ятэ ылъэныкъокIэ Василий Абатуровыр Хэгъэгу зэошхом илъэхъан лъэсыдзэ разведкэм иотделение икомандирыгъ. Гъунапкъэм Iутэу заор къежьагъ. Апэрэ мафэхэм къащегъэжьагъэу заом лIыгъэ щызэрихьагъ. Игъэхъагъэхэм афэшI Жъогъо Плъыжьым иорден къыфагъэшъошагъ. Янэ ылъэныкъокIэ ятэжъ ятэу Михаил Мишиным Европэр шъхьафит ашIыжь зэхъум зэпэуцужь пхъашэу щыIагъэхэм лIыгъэ зэращызэрихьагъэм фэшI я III-рэ шъуашэ зиIэ Щытхъум иорден къыратыгъ.Евгений къызэриIуагъэмкIэ, хэушъхьафыкIыгъэ дзэ операцием кIон зэхъум, игупсэхэр гумэкIыгъэх, арэу щытми, унагъор къыпэуцугъэп, сыда пIомэ къулыкъу ыхьыныр исэнэхьат епхыгъэу щыт, къыдырагъэштагъ.2014-рэ илъэсым къыщегъэжьагъэу Евгений зэо зэфэшъхьафхэм ахэтыгъ, ахэм яветеран. Террористхэм апэуцужьыгъэнымкIэ Дагъыстан, Чэчэным ащыкIогъэ хэушъхьафыкIыгъэ операциехэм ахэлэжьагъ. ИлъэситIу пэпчъ Кавказым ишъолъыр горэм командировкэ щихьыгъ.— ХэушъхьафыкIыгъэ дзэ операцием сызэкIом, Росгвардием къулыкъур зэрэщысхьыгъэр къысшъхьэпагъ, ащ хэшIыкI фысиIагъ. Хэти мамыр щыIакIэ иIэ шIоигъу, ар гъэпытэгъэным сыфэбэнэнэу ары хэушъхьафыкIыгъэ дзэ операцием сызкIэкIуагъэр, — къыIуагъ Евгений.Дзэ пшъэрылъэу къыфагъэуцугъэр лIыблэнагъэ хэлъэу зэригъэцэкIагъэм, гущыIэ пытэу ытыгъэм псэемыблэжьэу зэрэфэшъыпкъагъэм афэшI бгъэхалъхьэхэу «За отвагу», «Участник СВО» ыкIи медалэу «За отличие в службе» зыфиIорэм ия III-рэ шъуашэ къыфагъэшъошагъэх.— Сыд фэдэрэ лъэхъани УIэшыгъэ КIуачIэхэм къулыкъур ащыхьыгъэныр агъэлъапIэ. Ар хъулъфыгъэ пэпчъ ипшъэрылъэу сэлъытэ. Iофхэм язытет зэрэмыпсынкIэр, пшъэдэкIыжь ин зэрэсиIэр къызгурыIозэ а лъэбэкъур сшIынэу тесыубытагъ. Дзэ-патриотическэ пIуныгъэу къысхалъхьагъэр ащ ылъапсэу сэлъытэ, — еIо Евгений.Ащ унэгъо дахэ иI, икIэлэцIыкIухэм илъэси 8, илъэси 2 ыкIи мэзи 2 аныбжь.Реанимацием ыуж Евгений икIэрыкIэу кIоным зыфигъэсэжьыгъ, ащ ыIэ джабгъу къыдеIэрэп, я 3-рэ купым хэхьэрэ сэкъатныгъэ къыратыгъ, мы уахътэм ипсауныгъэ зэтырегъэуцожьы.Мы мафэхэм Евгений социальнэ координаторэу шъолъыр фондэу «Хэгъэгум иухъумакIохэр» зыфиIорэм Iоф щешIэ. Ежь фэдэ къулыкъушIэхэу уIагъэ тещагъэу къэзыгъэзэжьыгъэхэм иIэпыIэгъу арегъэкIы. Ащ нэмыкIэу «ЛIыхъужъым идесэхэр» зыфиIорэ Iофтхьабзэу еджапIэхэм ащызэхащэхэрэм арагъэблагъэ, ныбжьыкIэхэм яхэгъэгу шIу алъэгъоу пIугъэнхэм дэлажьэ.ХэушъхьафыкIыгъэ дзэ операцием хэлажьэхэрэм хабзэм лъэшэу ынаIэ къатет. Ар къызежьагъэм къыщыублагъэу кIалэхэм щытхъу хэлъэу, IэпэIэсэныгъэ ин яIэ хъугъэу къулыкъур ахьы.— Анахь шъхьаIэр уикъэралыгъо шIу плъэгъуныр, ащ ифедэхэр къэуухъумэнхэм уфэблэныр ары, — еIо Евгений. — ЗэкIэри зэфэдэу, теубытэгъэ пытэ ахэлъэу япшъэрылъхэр агъэцакIэх. КъулыкъушIэхэм къагурэIо текIоныгъэр къыдэтэхыфэ тызэрэлъыкIотэн фаер. ХэкIыпIэ закъор – ТекIоныгъ! Ар къызэрэблэгъэщтым тицыхьэ телъ, тиIофшIэн къиными, Хэгъэгум, цIыфхэм ящыкIагъ.ХэушъхьафыкIыгъэ авиационнэ отрядэу Евгений зыхэтыгъэм 2011-рэ илъэсым къыщегъэжьагъэу Адыгэ Республикэм Iоф щешIэ. ЫпэкIэ ар АР-м хэгъэгу кIоцI IофхэмкIэ и Министерствэ хахьэщтыгъ. 2016-рэ илъэсым къыщыублагъэу Росгвардием и ГъэIорышIапIэу АР-м щыIэм ратыжьыгъ. Отрядым зиушъомбгъугъ, ищыкIагъэм фэдиз техники, Iаши арагъэгъотыгъ. Мыщ къулыкъу щызыхьыхэрэр еджакIо Ижевскэ агъакIох, цIыф зэрымыс быбырэ пкъыгъор агъэфедэнымкIэ яшIэныгъэхэм ахагъахъо.Шъугу къэдгъэкIыжьын, УФ-м зыкъэухъумэжьынымкIэ и Министерствэ цIыф зэрымыс быбырэ пкъыгъохэм (БПЛА) ядзэхэм ягъэпсын икIыгъэ илъэсым ригъэжьагъ. Зэзэгъыныгъэ шIыкIэм тетэу къулыкъур зыхьынэу шIоигъоныгъэ зиIэхэу Мыекъуапэ щыпсэухэрэм дзэ комиссариатэу ащ дэтым зыщарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр:117#4 ыкIи 8 (8772) 52-11-28.Джащ фэдэу шъузщыпсэурэ чIыпIэм щыIэ дзэ комиссариатым зыфэжъугъазэмэ, шъуищыкIэгъэ къэбарыр яжъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбарыр ижъугъотэщт.Мамырныгъэр ягъогогъоу тидзэкIолIхэм шIэхэу къагъэзэжьынэу афэтэIо!КIАРЭ Фатим.