«Единэ Россием» ихъарзынэщ
Къэралыгъо проектэу «КIэлэцIыкIу спортыр» зыфиIорэр партиеу «Единэ Россием» игукъэкI. Псауныгъэм ипсыхьанкIэ, сабыйхэр чанэу спортым пылъынхэмкIэ ищыкIагъэр ягъэгъотыгъэным ар атегъэпсыхьагъ.
ЕджапIэхэм ыкIи урамым спортым зыщягъэушъомбгъугъэныр ипшъэрылъ шъхьаIэхэм ащыщ. КIэлэцIыкIухэр анахьэу зыпылъ спорт лъэпкъхэмкIэ муниципальнэ, шъолъыр ыкIи къэралыгъо мэхьанэ зиIэ Iофтхьабзэхэм язэхэщэн, еджэпIэ, щагу спорт купхэм азыфагу зэнэкъокъухэр, фестивальхэр ащырегъэкIокIыгъэнхэр къыдыхэлъытагъэх.Къэралыгъо проектэу «КIэлэцIыкIу спортыр» зыфиIорэм игъэцэкIэн Адыгеим зэрэщыкIорэм партиеу «Единэ Россием» икуп шъхьаф фэгъэзагъ. ШъолъырымкIэ игъэIорышIакIор АР-м боксымкIэ итренер шъхьаIэу Александр Ким.— Анахь шъхьаIэу тызфэгъэзагъэр физкультурэм пыщагъэ хъунхэмкIэ ищыкIэгъэ пстэури кIэлэцIыкIухэм ядгъэгъотыныр ары. Арышъ, спорт инфраструктурэм зедгъэушъомбгъунымкIэ амалэу щыIэр зэкIэ тэгъэфедэ. Спорт унэхэм ыкIи еджапIэхэм адэт стадионхэм ягъэцэкIэкIэжьынрэ яшIынрэ «КIэлэцIыкIу спортыр» зыфиIорэ программэр икъоу зэрэдгъэцакIэрэм ишыхьат. Партием ипроект щыIэ зыхъугъэм къыщегъэжьагъэу еджапIэхэм спорт унэхэр ащытшIыгъэх, спорт псэуалъэхэр ащыдгъэпсыгъэх, — къыIуагъ Александр Ким.Аужырэ илъэсхэм спорт псэолъи 150-рэ Адыгеим щагъэпсыгъ. Ахэм япчъэгъэшIу чылэхэм ателъытагъ. 2024-рэ илъэсым псэупIэу Яблоновскэм игурыт еджапIэу N 3-м спортымкIэ модульнэ унэ иIэ хъугъэ. 2025-м мы программэ дэдэмкIэ Мыекъуапэрэ (я 5-рэ гимназиер) псэупIэу Лъэустэнхьаблэрэ (ур. Гидростроителей, унэу 17/1) псэолъитIу ащагъэуцугъ.— БэнэкIэ лъэпкъ зэфэшъхьафхэм спортым апыщагъэхэм япчъагъэ илъэс къэс зэрахахъорэр тэлъэгъу, арышъ, шъхьадж зыщыпсэурэм пэблагъэу инфраструктурэр щытэгъэпсы, цIыкIуи ини спортым зыщыпылъыщт чIыпIэхэр республикэм икъогъупэ пэпчъ щытэшIы. Ащ пае лъэпкъ проектхэр, къэралыгъо программэхэр ыкIи «Единэ Россием» ипартийнэ программэхэр ыкIи бюджетым щымыщ къэкIуапIэхэр тэгъэфедэх, — къащитхыгъ ихъытыу нэкIубгъохэм АР-м и ЛIышъхьэу КъумпIыл Мурат.Джащ фэдэу къэралыгъо программэу «КIэлэцIыкIу спортыр» зыфиIорэм къыдыхэлъытагъэу урам кIэлэцIыкIу футболымкIэ муниципальнэ, шъолъыр ыкIи къэралыгъо зэнэкъокъухэр республикэм щызэхащэх. 2023-рэ илъэсым къыщегъэжьагъэу партиеу «Единэ Россиер» иIэпыIэгъоу кIэлэцIыкIу урам баскетболэу «3x3» зыфиIорэ Урысые фестивалым ишъолъыр едзыгъо Адыгеим щырекIокIыгъ. Республикэм ирайонхэм ыкIи икъалэхэм къарыкIырэ шъэожъые ыкIи пшъэшъэжъые купхэр ащ хэлажьэх.2024-рэ илъэсым спорт бэнэнымкIэ апэрэ Урысые фестивалэу «Борьба в школу» зыфиIорэм ишъолъыр едзыгъо шъхьэфит бэнэнымкIэ спорт еджапIэм щыкIуагъ. Партиеу «Единэ Россием» и Адыгэ шъолъыр къутамэрэ АР-м физическэ культурэмрэ спортымрэкIэ и Комитетрэ ащкIэ IэпыIэгъу хъугъэх.— Адыгеир бэнэкIо бэлахьхэмкIэ сыдигъуи цIэрыIу. БэнэкIэ лъэпкъ зэфэшъхьафхэр тикультурэ, тилъэпкъ ишэн иIахь шъыпкъ. Пкъы ыкIи гу пытэхэу, бэнакIохэу, текIоныгъэм фаблэхэу ны-тыхэми спорт еджапIэхэм ягъэсакIохэми кIэлэцIыкIухэр апIух ыкIи тишъолъыркIэ къэгъэлъэгъонышIухэр тиIэх. Самбэм, дзюдом ыкIи боксым апылъ сабыйхэм япчъагъэ илъэс къэс хэхъо. Урысыем цIыф лъэшхэр ищыкIагъэх, — къыхигъэщыгъ Александр Ким.«КIэлэцIыкIу спортыр» зыфиIорэ къэралыгъо программэм иIофшIэн мы илъэсми лъегъэкIуатэ. Ащ къыдыхэлъытагъэу урам футболымрэ баскетболымрэкIэ кIэлэцIыкIу фестиваль мыгъэ рагъэкIокIынэу рахъухьагъ. ПстэумкIи программэр 2030-рэ илъэсым нэс телъытагъ.— Ифизическэ зытет ыгъэпытэнымкIэ, спортым ылъэныкъокIэ гъэхъэгъэшIухэр ышIынхэмкIэ зызщыдэлэжьышъущт чIыпIэм кIоным кIэлэцIыкIур ренэу кIэхъопсын фае. Ащ фэдэ амалхэр Адыгеим иIэх ыкIи ахэм ахэдгъэхъощт, — къыIуагъ Александр Ким.
Анцокъо Ирин.