Гъэсэныгъэ гупчэу «Полярис-Адыгея» зыфиIорэм зэхищэгъэ яблэнэрэ Гъэмэфэ спорт еджапIэм иIофшIэн лъагъэкIуатэ. Адыгэ къэралыгъо университетым изекIо чIыпIэу «Горная легенда» зыцIэм ар щырагъэкIокIы.
Мэкъуогъум и 2-м къыщегъэжьагъэу мыщ спортсмени 100 щызэрэугъоигъ. Ахэм баскетболымкIэ, волейболымкIэ, кушъхьэфэчъэ спортымкIэ, теннис цIыкIумкIэ ыкIи лазертагымкIэ заушэты.Мафэ къэс ахэм зэнэкъокъухэм зафагъэхьазыры, гъогогъуитфэ агъашхэх, джащ фэдэу биологиемкIэ, хьисапымкIэ ыкIи химиемкIэ егъэджэнхэр афызэхащэх. Хэхъоныгъэу ашIыхэрэр агъэунэфынхэм пае тестирование арагъэкIу. КIэлэеджакIохэм илъэси 10-м къыщегъэжьагъэу 16-м нэс аныбжь.
Мы мафэхэм едзыгъуих къыздыхэлъытэгъэ эстафетэр рагъэкIокIыгъ. Пэрытныгъэр волейболистхэм аубытыгъ, теннис цIыкIум пылъхэм ятIонэрэ чIыпIэр афагъэшъошагъ, волейболисткэхэр ящэнэрэх. Мы илъэсым апэрэу еджапIэм ипрограммэ хагъэхьагъ физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ифестиваль. Ащ къыдыхэлъытагъэу командэхэр зэнэкъокъугъэх. Зэфэхьысыжьхэм къызэрагъэлъэгъуагъэмкIэ, волейболистхэм текIоныгъэр къыдахыгъ, ахэм очко 3685-рэ рагъэкъугъ, ятIонэрэ хъугъэх очко 3682-рэ къэзыхьыгъэ волейболисткэхэр, кушъхьэфэчъэ спортым пыщагъэхэм очко 3452-рэ рагъэкъугъ ыкIи ящэнэрэ хъугъэх.Гъэмэфэ спорт еджапIэм иIофшIэн мэкъуогъум и 22-м ыухыщт.