«ИскусствэхэмкIэ еджэпIэ анахь дэгъу-2026-рэ» зыфиIорэ я VII-рэ зэнэкъокъу Адыгэ Республикэм щыкIуагъ.
ЕджэпIэ анахь дэгъухэр осэшI купым къыхихыгъэх, текIоныгъэ къыдэзыхыгъэхэр агъэшIуагъэх. АР-м культурэмкIэ и Министерствэ Iофтхьабзэм кIэщакIо фэхъугъ.ИскусствэхэмкIэ кIэлэцIыкIу еджапIэхэм ачIэсхэр музыкальнэ Iэмэ-псымэхэм къарагъэIошъунхэм, сурэт ашIыным, орэд къаIоным, къэшъоным афагъасэх, компьютер графикэр агъэфедэзэ дизайным, театральнэ искусствэм ыкIи нэмыкIхэм нэIуасэ афашIых. КIэлэеджакIохэр творческэ зэнэкъо-къухэм, Iофтхьэбзэ зэфэшъхьафхэм чанэу ахэлажьэх.«ИскусствэхэмкIэ къэлэ еджэпIэ анахь дэгъу-2026-рэ» зыфиIорэ цIэ лъапIэр искусствэхэмкIэ кIэлэцIыкIу еджапIэу Лъэцэрыкъо Кимэ ыцIэ зыхьырэм фагъэшъошагъ. Ащ ипащэр Анзэрэкъо Марзиет. ИскусствэмкIэ къоджэ еджэпIэ анахь дэгъу хъугъэ искусствэхэмкIэ кIэлэцIыкIу еджапIэу псэупIэу Джаджэм щыIэр, ипащэр Мэрэтыкъо Эдуард.— Культурэм хэхъоныгъэ ышIынымкIэ искусствэхэмкIэ еджапIэхэм мэхьанэшхо яI. ОрэдкъэIонымкIэ, къэшъонымкIэ, сурэтшIынымкIэ ныбжьыкIэхэм яапэрэ лъэбэкъухэр мыщ ащашIых. Ахэм ясэнаущыгъэ ыкIи ятворчествэ икъызэIухын мыпшъыжьэу кIэлэегъаджэхэр дэлажьэх. Лъэпкъ проектым ишIуагъэкIэ псэуалъэхэр тэгъэцэкIэжьых, искусствэхэмкIэ еджапIэхэм апае Iэмэ-псымакIэхэр къэтэщэфых, — къыIуагъ АР-м культурэмкIэ иминистрэу Аулъэ Юрэ.Зэнэкъокъум изэхэщакIохэр текIоныгъэ къыдэзыхыгъэ еджапIэхэм афэгушIуагъэх. Джы ахэр зэнэкъокъум изичэзыу едзыгъо хэлэжьэнхэу загъэхьазыры.Лъэпшъыкъо Фатим.