М. Гордышов
Петербург щыкIорэ дунэе экономическэ форумым IофшIэгъу зэIукIэгъухэр тыгъуасэ щылъагъэкIотагъэх.
Ахэм къахиубытэу Адыгеим и ЛIышъхьэу КъумпIыл Муратрэ Къэбэртэе-Бэлъкъарым и ЛIышъхьэу КIокIо Казбекрэ экономикэм, гъэсэныгъэм, культурэм, псауныгъэм икъэухъумэн ыкIи нэмыкI лъэныкъохэм япхыгъэ Iофыгъуабэхэм атегущыIагъэх.ЫпэкIэ зэдашIыгъэгъэ зэзэгъыныгъэхэм атегъэпсыхьагъэу шъолъыритIумэ проектхэр пхыращых, творческэ, научнэ, ныбжьыкIэ купхэр зэхахьэх, IофышIэхэм ягъэхьазырын ыкIи ахэм яIэпэIэсэныгъэ нахь зыкъегъэIэтыгъэным япхыгъэ Iофтхьэбзэ гъэнэфагъэхэр зэшIуахых.
«Къошныгъэ зэфыщытыкIэ фабэхэр ренэу тишъолъыритIумэ азыфагу илъых. Титарихъ зы, экономикэм, культурэм, социальнэ лъэныкъом япхыгъэ Iофтхьабзэхэр пхырыщыгъэнхэм лъэныкъуитIуми тынаIэ тетэгъэты. Урысыем щыпсэурэ цIыф лъэпкъ зэфэшъхьафхэм афэдэу тиухъумакIохэри хэушъхьафыкIыгъэ дзэ операцием ишъолъыр неонацистхэм щапэуцужьых. Ащ фэдэ зэпхыныгъэ-гъусэныгъэр тапэкIи дгъэпытэн мурад тиI, Президентэу Владимир Путинымрэ УФ-м и Правительствэрэ къаугъэуцурэ пшъэрылъхэм атетэу республикитIуми хэхъоныгъэ зэрашIыщтым тызэгъусэу тыдэлэжьэщт! — къыIуагъ АР-м и ЛIышъхьэу КъумпIыл Мурат.ШъолъыритIумэ япащэхэр хэушъхьафыкIыгъэ дзэ операцием хэлажьэхэрэм IэпыIэгъоу аратырэм нэсыгъэх. Адыгеими, Къэбэртэе-Бэлъкъарми яобществэ икIочIэ шъхьаIэхэр зэкIэ а IофшIэным хэлажьэх. Партиеу «Единэ Россием» пэщэныгъэ дызэрихьэзэ, дзэ подразделениехэм IэпыIэгъу араты, дзэ операцием хэлажьэхэрэм ыкIи ахэм яунагъохэм арысхэм федеральнэ, шъолъыр IэпыIэгъур алъагъэIэсы. Ащ дакIоу республикитIуми амал зэфэшъхьафхэр а IэпыIэгъумкIэ агъэфедэх, IофшIэкIэшIоу аIэкIэлъ хъугъэм а IофшIэныр джыри нахь агъэлъэшынымкIэ ишIуагъэ къэкIощт.НыбжьыкIэхэм азыфагу илъ къошныгъэ зэпхыныгъэхэр гъэпытэгъэнхэм, нахьыбэрэ зэхэхьанхэм, яеплъыкIэ-гупшысэхэр зэлъагъэIэсынхэм шъхьафэу тегущыIагъэх. Мы илъэсым жъоныгъуакIэм Адыгеим икIыгъэ кIалэхэмрэ пшъашъэхэмрэ Урыс-Абхъаз ныбжьыкIэ зэIукIэу Налщык щыкIуагъэм хэлэжьагъэх. ТилIыкIо куп гуфэбэныгъэ хэлъэу къызэрэпэгъокIыгъэхэм пае зэрафэразэр КъумпIыл Мурат къыхигъэщыгъ.«Къэбэртэе-Бэлъкъарымрэ Адыгеимрэ блэгъэныгъэ-къошныгъэ зэфыщытыкIэхэм зэрапхых, экономикэмрэ социальнэ лъэныкъомрэ хэхъоныгъэ ягъэшIыгъэнымкIи Iофтхьэбзабэ зэдызэшIуахы. ТидзэкIолIхэр хэушъхьафыкIыгъэ дзэ операцием щыIэхэу Хэгъэгур къаухъумэ. Къэбэртэе-Бэлъкъарым щыпсэухэрэм Адыгеим ис цIыфхэм якъини, ягушIуагъуи адагощы, Адыгеим къикIырэ къэбархэри ягунэсых. Iо хэлъэп, лъэныкъо пстэумкIи, анахьэу етIани ныбжьыкIэ политикэмкIэ, тизэдэлэжьэныгъэ тапэкIи зедгъэушъомбгъущт», — къыIуагъ КъБР-м и ЛIышъхьэу КIокIо Казбек.Къэбэртэе-Бэлъкъарым иныбжьыкIэхэр Адыгеим щырекIокIырэ гъэсэныгъэ, культурнэ, спорт ыкIи нэмыкI Iофтхьабзэхэм ренэу зэрахэлажьэхэрэр КIокIо Казбек агу къыгъэкIыжьыгъ. Анахьэу агу рихьырэр ныбжьыкIэ слетэу «Фыщт» зыфиIорэр ары, Адыгэ Республикэм икъушъхьэлъэ чIыпIэхэм ахэт Кавказ биосфернэ заповедникым ар щэкIо.ЗэIукIэгъум илъэхъан бгъуитIури зэзэгъыгъэх лъэныкъо зэфэшъхьафхэмкIэ язэдэлэжьэныгъэ лъагъэкIотэнэу, тапэкIи ар нахь гъэпытэгъэнымкIэ амалэу щыIэхэм ягъэунэфын нахь игъэкIотыгъэу дэлэжьэнхэу.АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.