Зэзэгъыныгъэм зэдыкIэтхагъэх

Адыгэ Республикэм и Правительствэрэ ВТБ-мрэ зэрэзэдэлэжьэщтхэм фэгъэхьыгъэ зэзэ­гъы­ныгъэм форумым щыкIэтхагъэх. Тхылъым аIэпэкIадзэхэр кIагъэуцуагъэх Адыгеим и ЛIышъхьэу КъумпIыл Муратрэ банкым иправление ипрезидент — итхьаматэ игуадзэу Денис Бортниковымрэ.

ЛъэныкъуитIум банкым технологиеу ыгъэфедэхэрэм, инфрастурктурэм за­рагъэушъомбгъущт. Шъолъырым иин­вестицие программэхэм япхырыщынкIэ банкыр IэпыIэгъу къыфэхъущт. ЧIы­фэхэм (кредитхэм) ятын, къэралыгъо IэпыIэгъум къыщыдэлъытагъэхэри зэрахэтхэу, хэушъхьафыкIыгъэу зэзэгъыныгъэм щыгъэнэфагъ.«Банк пэрытхэм тиреспубликэ зызэрэщаушъомбгъурэр тигуапэ, ар финансхэмкIэ фэIо-фашIэхэм ябэдзэршIыпIэ зиушъомбгъуным фэIорышIэ. Непэ тызыкIэтхэгъэ зэзэгъыныгъэм ВТБ-м тызэрэдэлажьэрэр джыри нахь къыгъэлъэшыщт, бизнесым ыкIи фэгъэ­кIотэнхэр зиIэ цIыфхэм апае ­къэралыгъо IэпыIэгъум ипхырыщынкIэ, къэралыгъо-унэе зэпхыныгъэм зегъэушъомбгъугъэнымкIэ, цифрэ шIыкIэу банкым къыугупшысыгъэхэр мыщ щыгъэфедэгъэнхэмкIэ, нэмыкI лъэныкъохэмкIэ амалышIухэр къытыщтых. Ахэм зэкIэми экономикэми, цIыфэу республикэм щыпсэу­хэрэми шIуагъэ къафахьыщт», — къыIуагъ КъумпIыл Мурат.«Мы зэзэгъыныгъэм Адыгэ Рес­публикэм и Правительствэрэ банкымрэ язэдэлэжьэныгъэ иедзы­гъуакIэ къыщызэIуехы. Тимурадыр шъолъырым социальнэ-экономикэ амалэу иIэр гъэпытэгъэныр, инвес­торхэмкIэ нахь хъопсагъо хъунымкIэ тыдеIэныр ары. ВТБ-р предпринимательствэм хэхъоныгъэ ышIынымкIэ, бизнесым пае щыIэ амалхэр къызIэкIэ­гъэхьэгъошIу хъунхэмкIэ Iэпы­Iэгъу къытыным фэхьазыр», — къыхигъэщыгъ Денис Борт­никовым.2025-рэ илъэсым банкым икъутэмакIэ Мыекъуапэ къыщызэIуахыгъ, 2026-м офисыкIэм поселкэу Яблоновскэм иIоф­шIэн щыригъэжьагъ. ВТБ-м «икредитнэ портфель» республикэмкIэ сомэ мил­лиард 13-рэ мэхъу.Мы чIыпIэм КъумпIыл Муратрэ Денис Бортниковымрэ IофшIэгъу зэIукIэгъу щызэдыряIагъ. Ащ хэлэжьагъ АР-м экономикэ хэхъоныгъэмкIэ ыкIи сатыумкIэ иминистрэу КIыкI Артур.Шъолъырым исоциальнэ-экономикэ Iофхэм язытет, лъэныкъо шъхьаIэхэм хэхъоныгъэ ашIыным банкым иIахьэу хилъхьэрэм атегущыIагъэх. Къыхэдгъэщын, ВТБ-м имылъку псэупIэхэм яшIын, логистикэм ыкIи товар гъэтIылъыпIэхэм ягъэпсын ахелъхьэ, социальнэ проектхэм чанэу ахэлажьэ.