Партиеу «Единэ Россием» пэшIорыгъэшъ мэкъэтынэу ригъэкIокIыгъэм изэфэхьысыжьхэмкIэ, Адыгеим ыцIэкIэ УФ-м и Къэралыгъо Думэ ыкIи АР-м и Къэралыгъо Совет — Хасэм ядепутат хъунхэмкIэ хэдзынхэм кандидатэу къащагъэлъэгъощтхэр къэнэфагъэх.
Партием ыцIэкIэ Къэралыгъо Думэм идепутат хъунымкIэ кандидат 19 пэшIорыгъэшъ мэкъэтыным щатхыгъагъ. Зы мандат зиIэ хэдзыпIэ коеу N 1-м ыкIи федеральнэ партийнэ спискэм хэтхэу партием илIыкIо хъунхэм ахэр фэбэнагъэх.Хэдзынхэм язэфэхьысыжьхэмкIэ, зы мандат зиIэ коеу N 1-мкIэ хэдзакIохэм амакъэхэр нахьыбэу зыфатыгъэр Къэралыгъо Думэм идепутатэу Владислав Резник, федеральнэ спискэмкIэ программэу «ЛIыхъужъхэм яуахът» зыфиIорэм хэлажьэу, ЛIыхъужъныгъэм иордениплIымэ язехьакIоу Сергей Ковалевыр. ЯтIонэрэ чIыпIэм щыт джырэ уахътэм Къэралыгъо Думэм идепутатэу Хьасанэкъо Мурат.АР-м и Къэралыгъо Совет — Хасэм идепутат хъунхэмкIэ кандидат 279-рэ Адыгеим щатхыгъагъ. ПэшIорыгъэшъ мэкъэтыным текIоныгъэ къыщыдэзыхыгъэхэм кIэлэегъаджэхэр, врачхэр, хэушъхьафыкIыгъэ дзэ операцием иветеранхэр, джыдэдэм Iоф зышIэрэ депутатхэр, сатыушIэхэр ахэтых. Республикэм и Парламент идепутатхэм яхэдзынхэм партием ыцIэкIэ ахэр ахэлэжьэщтых.«Федеральнэ ыкIи шъолъыр лъэныкъохэм депутат лъэшхэр ахэдгъэхьанхэр типшъэрылъ шъхьаI. Хэбзэгъэуцугъэу аштэщтхэр шэпхъэшIухэм адиштэнхэм народнэ программэм цIыфхэм къыщагъэнэфэгъэ гумэкIыгъохэм язэшIохын ащ епхыгъэщт. Республикэм щыпсэурэ цIыфхэм щыIэкIэшIу яIэным тызэгъусэу Iоф дэтшIэщт», — хигъэунэфыкIыгъ партиеу «Единэ Россием» и Адыгэ ишъолъыр къутамэ игъэцэкIэкIо комитет ипащэу АфэшIэгъо Рэмэзан.