Мыекъопэ районым ит спорт еджапIэу «Олимпым» зыщызыгъэсэрэ Анна Максюта боксымкIэ Урысыем ипервенствэ джэрз медаль къыщихьыгъ. Къалэу Одинцово щыкIогъэ зэнэкъокъум илъэс 13 – 14 зыныбжь пшъашъэхэр хэлэжьагъэх, зэкIэмкIи нэбгырэ 218-рэ хъущтыгъэх.
Аннэ зэIукIэгъоу иIагъэхэм дэгъоу закъыщигъэлъэгъуагъ, мы спорт лъэпкъым республикэм мэхьанэшхо зэрэщыратырэр къыгъэшъыпкъэжьыгъ. Медалэу къыхьыгъэм дакIоу, типшъашъэ Урысыем ихэшыпыкIыгъэ командэ хэхьагъ.Спортсменкэ ныбжьыкIэм гъэхъэгъэшIухэр ышIынхэм тренерхэу Григорий Бегларянрэ Азадуи Бегларянрэ яIахьышIу хэлъ. Аннэ, ащ иунагъо ыкIи зыгъасэхэрэм тафэгушIо. Адыгеир испортсменхэм сыдигъуи арэгушхо.