ФутболымкIэ Къыблэ ыкIи Темыр-Кавказ федеральнэ шъолъырхэм япервенствэ къалэу Ростов-на-Дону щыкIуагъ. Зыныбжь илъэс 50-м къехъугъэхэр ары ащ хэлэжьагъэхэр. Командибгъу текIоныгъэм фэбэнагъ.
Анахь лъэшхэм ахалъытэщтыгъэх «Ростоврэ» «Кубаньрэ», мы командитIум гъогогъу 11-рэ турнирым текIоныгъэр къыщыдахыгъ. Краснодар икуп хэтыгъэх Мыекъуапэ щыщхэу Айтэчыкъо Руслъанрэ Игорь Калиниченкэмрэ. Апэрэ едзыгъом къыдыхэлъытэгъэ ешIэгъоу «Кубань» иIагъэр элистинскэ «Ураланым» 0:1-у шIуихьыгъ, ащ къыхэкIэу краснодарцэхэм купым ятIонэрэ чIыпIэр щаубытыгъ. Ау зэIукIэгъу шъхьаIэхэм командэм дэгъу дэдэу закъыщигъэлъэгъуагъ. Финалныкъом щызэIукIагъэх «Кубаньрэ» «Ростоврэ». Пчъагъэр зэфэдизэу ешIэгъур аухыгъ, ащ къыхэкIэу текIоныгъэр къыдэзыхыщтыр пенальтикIэ къэнэфагъ, «Кубань» ифутболистхэм ар нахь дэгъоу агъэцэкIагъ ыкIи финалым ихьагъэх. ЯтIонэрэ финалныкъом Ставрополь краим икомандэ текIоныгъэр къыщыдихи, апэрэ чIыпIэм фэбэнэн амал иIэ хъугъэ. Краснодаррэ Ставропольрэ якомандэхэр финалым щызэIукIагъэх, пенальтикIэ 5:4-у ставропольцэхэр текIуагъэх, апэрэу ащ иветеранхэр чемпион хъугъэх. Ящэнэрэ чIыпIэр «Ростов» къыдихыгъ.Мы зэнэкъокъур тапэкIи лъагъэкIотэщт, джы ар нэмыкI къалэхэм ащыкIощт.