Мыекъопэ «Зэкъошныгъэм» иешIэкIо пэрытхэм ащыщыгъэу Анатолий Абрамовым ишIэжь фэгъэхьыгъэ зэнэкъокъур ыкIэм фэкIо. Мы мафэхэм финалныкъом къыдыхэлъытэгъэ ешIэгъухэр командэхэм яIагъэх.Апэрэм щызэIукIагъэх «Ошъутенэмрэ» «Ансарымрэ». Командэхэр узIэпищэу, дахэу джэгугъэх. Абрамовым и Кубок гъогогъуихэ къыдэзыхыгъэ «Ошъутенэм» зэIукIэгъур дэгъоу ригъэжьагъ. Я 6-рэ такъикъым Къуныжъ Артур къэлапчъэм Iэгуаор дидзагъ, ащ ыуж такъикъи 4 тешIагъэу пчъагъэм хигъэхъуагъ командэм икапитанэу Арсен Мазловым, мы футболист дэдэм пчъагъэр 3:0 ышIыгъ. Ау «Ансарыр» къызэкIэкIуагъэп, ешIэгъур аухынкIэ такъикъ заулэ къэнагъэу къэлапчъэм IэгоуитIу дадзагъ, пчъагъэр 3:2 хъугъэ. Ау охътэ шъхьаIэм хагъэхъогъэ ятIонэрэ такъикъым ЛIыхъурэе Эдуард пчъагъэр 4:2 ышIыгъ, «Ошъутенэм» текIоныгъэр къыдихыгъ.
ЯтIонэрэ финалныкъом щызэдешIагъэх «Кавказымрэ» «Легионымрэ». Апэрэ таймым командэхэм къэлапчъэм Iэгуаор дадзэнымкIэ амалышIухэр яIагъ, ау къадэхъугъэп. ЯтIонэрэм «Кавказыр» хэпшIыкIэу нахь щылъэшыгъ. Мыщ хэтхэ Датхъужъ Адам, Пщыхъожь Ислъам ыкIи Делэкъо Мурат къэлапчъэм зырызэ Iэгуаор дадзагъ, пчъагъэр 3:0-у зэIукIэгъур аухыгъ.ЖъоныгъуакIэм и 31-м стадионэу «Юность» зыфиIорэм кIэух ешIэгъухэр щыкIощтых. Пчыхьэм сыхьатыр 6-м я 3-рэ чIыпIэм фэбэнэщтых «Ансарымрэ» «Легионымрэ». Ащ ыуж сыхьатыр 19.30-м финалым щызэIукIэщтых «Ошъутенэмрэ» «Кавказымрэ».Зэнэкъокъум икIэух зэIукIэгъухэм шъуяплъынэу зэхэщакIохэм шъурагъэблагъэ.