Гъунапкъэхэр зэIузыхырэусэ сатырхэр

Адыгэ-абхъаз литературнэ фестивалэу «Строфы на Ру­фабго» зыфиIорэр Рыфабгъо ипсыкъе­чъэхыпIэхэм ащызэфашIыжьыгъ. аб­хъаз усакIоу Гунда Сакания, сурэтышIэу Анна Сангулия ыкIи хы ШIуцIэ Iушъо шапсыгъэхэм ащыщэу, врачэу, усакIоу Хьасэнэ Алал ягъусагъэх респуб­ликэмкIэ фестивалым изэхэщакIоу Адыгеим ибзылъ­фыгъэхэм я Союз ­хэтхэр, КъТРК-у «Адыгеим», гъэзетэу «Адыгэ макъэм» яжурналистхэр.

Ошъопщэ-оелэ мафэу зэ­рэщы­тыгъэм емылъытыгъэу хьа­кIэхэми бысымхэми дэкIыгъом гухахъо хагъотагъ.Рыфабгъо ипсыкъечъэ­хыпIэхэм уязыщэлIэрэ лъэ­мыджым фестивалым ихьа­кIэхэр икIыхэ зэхъум, Шъхьэ­гуащэ ипсыорхэу мэфэ пчъагъэхэм къещхыгъэ ощхым кIочIэ лыеу ахигъэхъуагъэр нэрылъэгъу афэхъугъ, зэхашIагъ. ЗекIо чIыпIэм ибысымэу Бибэ Нуриет гуфэбэныгъэр къыбгъодэкIэу хьакIэхэм къапэгъокIыгъ. Апэрэ псыкъе­чъэхыпIэу «Шум» зыфи­Iорэм фестивалым хэ­лэ­жьагъэхэр екIолIагъэх. Зы­зымышIэжьэу мыжъо сыджхэм къячъэхырэ псы орхэм тIо загощыгъэу ятIонэрэ псыкъечъэхыр гъэпсыгъэ зэрэхъугъэр зэкIэми ящыпэлъэгъугъ. Псыхъори инэпкъыхэм ­къадэкIыгъэу екIолIапIэр нахь зэжъу хъугъагъэ нахь мышIэми, мыжъо жъгъэймэ атетхэу псыкъечъэхыр акIыбэу абхъаз, адыгэ уса­кIохэм ятхыгъэхэм фестивалым хэлажьэхэрэр къя­джагъэх. Гунда Сакания фестивалым иапэрэ мафэ щыублагъэу къыIощтыгъ:— Сэ къысэхьылIэгъэ пстэуми мистикэр — зи­лъапсэ къэмышIэрэ хьа­лэмэтыгъэ горэ ахэлъ зэпыт. Мыщ фэдэу чIыопсыр къызэрэтпэгъокIыгъэми ар хэсэлъагъо, икIуачIэу къысигъэлъэгъурэр сэркIэ тхъа­гъо. Адыгэ чIыгум тыщы­хымэп, Кавказ къушъхьэхэм тызэрапхы, тызэщыщ, тызылъэпкъ.Гундэ усэхэм дэхэ дэдэу къяджагъ. Баграт Шинкуба, Владимир Зантария, Анатолий Лагулаа, МэщбэшIэ Исхьакъ, ежь ытхыгъэ усэхэри ахэм ахэтыгъэх. Джащ фэдэу адыгэ ыкIи абхъаз усакIохэм ятхы­гъэхэм къяджагъэх Хьа­сэнэ Алал, ХьакIэмыз Сусанэ, Нэгъэрэкъо Саниет, МатIыжъ Аминэт, Вэрэкъо Хьалимэт.ПсыкъечъэхыпIэм иорхэм къапыкIырэ жьышхом Гундэ ишъхьарыхъон ыцыпэхэр ыIэтэу, чIыопсэу ылъэгъу­рэм IаплI рищэкIы шIоигъом фэдэу, ыIэхэр фищэизэ псыкъечъэхыпIэм Iутыгъ. УсакIом ыгу щиз зэрэхигъахъорэр къыхэщэу ынэпсыхэр къышIуакIо­щтыгъ. Ылъэгъурэм, зэхишIэрэм игушъхьэ баи­ныгъэ зэрэхигъэхъуагъэр, тичIыгу шIу зэрилъэгъугъэр шъхьэихыгъэу къыIощтыгъ. КIэухым фестивалым хэлажьэхэрэр псыкъечъэхыпIэм дэжь сурэтхэр зыщытырахыгъ.Адыгеим ижурналистхэм я Союз итхьаматэу, АР-м изаслуженнэ журналистэу ТIэшъу Светланэ Гунда Сакания ыкIи Анна Сангулия телевизионнэ зэдэгущыIэгъухэр адытыритхагъэх. ЗекIо чIыпIэм ибысымэу Бибэ Нуриет фестивалым хэлажьэхэрэр ыхьэкIагъэх. Бзылъфыгъэм непэ щыIэныгъэм, унагъом, общест­вэм чIыпIэу щиубытырэм, изекIуакIэ, игущыIэ кIуачIэ зэриIэм, итворчествэ (ащ фэдэ сэнаущыгъэ Тхьэм къыхилъхьагъэу щытмэ) фэ­багъэу, акъылэу хэлъым, ащ дунаир къызэригъэда­хэрэм фестивалым хэла­жьэхэрэр тегущыIагъэх.Фестивалым ипрограммэ хэтэу гъэцэкIагъэ хъугъэ Iофтхьабзэм шъхьафэу игугъу къэтшIымэ тшIоигъу. Къэбэртэе-Бэлъкъар Рес­публикэм иусакIоу, тхакIоу Къанэкъо Заринэ гъэ къэс зэхищэрэ абхъаз-адыгэ литературнэ фестивалэу «Рифмы на Рице» зыфи­Iорэм зиIахьышхо хэзылъхьагъэхэу, 2026-рэ илъэ-­сым зэкIэлъыкIоу зидунай зыхъожьыгъэхэ Абхъаз ­Республикэм икъэралыгъо ыкIи иобщественнэ Iофы­шIэу, тхакIоу ыкIи зэдзэ­кIакIоу Владимир Зантария ыкIи тхакIоу, усакIоу, Аб­хъазым культурэмкIэ изаслуженнэ IофышIэу Анатолий Лагулаа яшIэжь агъэлъэпIагъ. Ахэм яусэхэр Хьасэнэ Алалэ, ХьакIэмыз Сусанэ, Тэу Замирэ, Нэ­гъэрэкъо Саниет адыга­бзэкIэ зэрадзэкIыжьыхи, фестивалым щагъэIугъэх.КIэлэцIыкIу журналхэу «Жъогъобын», «Родничок» зыфиIохэрэм яредакциехэм яIофышIэхэм хьакIэхэм заIуагъэкIагъ. IэпэIасэу Еутых Асе нэIуасэ фэхъугъэх, ащ и Дышъэ ордэунэ зэрагъэлъэгъугъ ыкIи лъэшэу агу рихьыгъ. Культурнэ Iофтхьэбзэ зэфэшъхьафэу республикэм игупчэ щы­кIуагъэхэм — къэгъэлъэ­гъон зэфэшъхьафхэм якъы­зэIухын, «Музейхэм ячэщ» зыфиIорэ зэхахьэхэм ахэлэжьагъэх, АР-м и Лъэпкъ музей ыкIи КъокIыпIэм щыпсэурэ лъэпкъхэм я Къэралыгъо музей икъутамэ къаплъыхьагъэх. Археологэу Тэу Аслъан нэIуасэ зыфашIыгъ, лъэпкъ тари­х­ъым ишъэфхэр ащ къафи­Iотагъэх.А зэпстэуми гухахъо хагъотагъэу, фестивалым зэрэхэлэжьагъэхэм рыра­зэхэу, гукъэкIыжь фабэ-хэр ренэу зэрэзыдаIы­гъыщтхэр къаIозэ хьакIэхэр кIожьыгъэх.Тэу Замир.