БлэкIыгъэ илъэсым Херсон хэкум ит поселкэу Вольнэм иеджапIэ Адыгеим испециалистхэм агъэцэкIэжьыгъ, зэтырагъэпсыхьажьыгъ, испорт площадкэ агъэкIэжьыгъ.
Джы республикэм игуфакIохэр поселкэм пхъэшъхьэ-мышъхьэ чъыгхэр щагъэтIысхьанхэу кIуагъэх.Чъыг цIыкIухэр АР-м и Къэралыгъо Совет — Хасэм идепутатэу Хъурымэ Казбек, Мыекъуапэ, Мыекъопэ районым и Краснооктябрьскэ псэупIэ кой яадминистрациехэм, АР-м мэзхэмкIэ и ГъэIорышIапIэ, гуфакIоу Вера Симашкевич (компаниеу «АдыгеяСептикСервис») къаратыгъэх.«Чъыгхатэр къыткIэхъухьэхэрэм тызэрафэгумэкIырэм итамыгъэу зэрэщытым имызакъоу, чIыопсыр къэухъумэгъэным ыкIи уи Хэгъэгу уфэлэжьэным мэхьанэу яIэр кIэлэцIыкIухэм алъыгъэIэсыгъэнымкIэ щысэшIу мэхъу. Вольнэм иеджапIэ шIэныгъэ зэрэщарагъэгъотырэм дакIоу, уичIыгу, укъэзыуцухьэхэрэ дунаим унаIэ атетын зэрэфаер щарагъашIэ», — къыхигъэщыгъ Бэрзэдж Асетэ.Джащ фэдэу псэупIэу «Верхняя Рогачика» зыфиIорэм дэт IэзапIэм къызэлъиубытырэ чIыпIэм изэтегъэпсыхьан паи чъыгхэр атIупщыгъэх. Охътэ благъэм пхъэшъхьэ-мышъхьэ чъыг 20, чъыгаеу — 15, «можжевельник» зыфаIорэ лъэпкъэу — 10 ыкIи кондэ — 20 ащ щагъэтIысхьащт. Социальнэ псэуалъэхэм язэтегъэпсыхьан «Единэ Россием» илъэпкъ программэ къыщыдэлъытагъ.ШIушIэ Iофтхьабзэм хэлэжьагъэх АР-м и Къэралыгъо Совет — Хасэм идепутатэу Хъурымэ Казбек, хэбзэихъухьэ ныбжьыкIэхэм я Палатэу ФедерациемкIэ Советым щызэхащагъэм социальнэ политикэмкIэ ыкIи псауныгъэм икъэухъумэнкIэ и Комитет, Адыгеим и НыбжьыкIэ парламент иащ фэдэ комитет япащэу Бэрзэдж Асет, Адыгэ республикэ IэзапIэу цэхэм зыщяIазэхэрэм иврач шъхьаIэу Шэуджэн Вячеслав, мы учреждением иврачэу Таман Щамхаловар, купэу «Надежда» зыфиIорэм иадминистраторэу Надежда Беличенкэр, гуфакIохэу Вера Коробковар, Степан Миракян.«Урысыем щыпсэурэ лъэпкъхэм языкIыныгъэ и Илъэсэу тихэгъэгу и Президент къыгъэнэфагъэр шIушIэ Iофэу зэдатшIэхэрэмкIэ, ащ фэдэ хъугъэ-шIагъэхэмкIэ зэхэт. Урысыем щыпсэурэ лъэпкъ зэфэшъхьафхэм, шъолъырхэм зэдеIэжьхэзэ, къиныгъо зиIэхэм ар къызэпачынымкIэ IэпыIэгъу зэрафэхъухэрэр, зэрэзэфэгумэкIыжьхэрэр, тхьамыкIагъо къэхъугъэми, гушIуагъо щыIэми, гъэхъагъэ ашIыгъэми зэрэзэдагощырэр, зэрэзэдаIэтырэр мафэ къэс нэрылъэгъу къысфэхъу. Мары непи тиныбджэгъушIухэу Адыгеим игуфакIохэм Херсон хэкум ит поселкэу Вольнэм иеджапIэ пхъэшъхьэ-мышъхьэ чъыгхэр щагъэтIысхьагъэх», — къыхигъэщыгъ Херсон хэкум исенаторэу Игорь Кастюкевич.