Оялэу зэрэщытым ыпкъ къикIэу Краснооктябрьскэ къоджэ псэупIэм чIычIэгъ псымэ зыкъыщаIэтыгъ.
Ощхыр зэрэбэм къыхэкIэу, хатэхэм, щагу 20-мэ псыр адэуцуагъ, унищмэ акIэуагъ. Мыекъопэ районым иадминистрацие къызэрэщытаIуагъэмкIэ, гумэкIыгъо хэфэгъэ цIыфхэр къазэрэфытеуагъэхэм тетэу ошIэ-дэмышIэ IофхэмкIэ республикэ къулыкъум ыкIи гъогушIхэм ялIыкIохэр ягъусэхэу а чIыпIэхэм якIолIагъэх, псыр зыдэуцогъэ щагухэм дэчъыпIэхэр афашIыгъэх. Зэрарыр гъэунэфыгъэным пае Краснооктябрьскэ къоджэ псэупIэм къыхиубытэрэ чIыпIэхэр къаплъыхьэх. ГъогушI техникэр къызфагъэфедэзэ гумэкIыгъохэр дагъэзыжьых. Псыр зыдэхьэгъэгъэ щагухэм адэкIыжьыгъ.