шъолъыр фондыр
Адыгеим икъэлэ шъхьаIэ зэнэкъокъоу «Хэгъэгум иухъумакIохэм я Кубок» зыфиIорэр ятIонэрэу щыкIуагъ. ХэушъхьафыкIыгъэ дзэ операцием, Iэшэ зэIуупIэныгъэхэм ыкIи дзэкъулыкъум яветеранхэр С. Г. Алифиренкэм ыцIэ зыхьырэ щэрыопIэ еджапIэм щызэнэкъокъугъэх.
Республикэм имуниципалитетхэм къарыкIыгъэ нэбгырэ 35-рэ фэдизмэ армреслингымкIэ, пауэрлифтингымкIэ, теннис цIыкIумкIэ, дартсымкIэ, щэрыонымкIэ заушэтын амал яIагъ.Iофтхьабзэм кIэщакIо фэхъугъэх Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэрэ АР-м физическэ культурэмкIэ ыкIи спортымкIэ и Комитетрэ.Пшъэрылъ шъхьаIэу ащ иIэр физическэ культурэм, спортым ыкIи адаптивнэ спорт лъэпкъхэм республикэм зыщаушъомбгъуныр, ветеранхэр социальнэу щыIэныгъэм зыкъыхагъотэныр ары.Шъолъыр фондым ветеранхэм алъэныкъокIэ зэрихьэрэ IофшIэныр АР-м и ЛIышъхьэу КъумпIыл Мурат сыдигъокIи хегъэунэфыкIы. ЗэIукIэгъухэм ащ къызэращиIорэмкIэ, дзэкъулыкъушIэ-хэм ыкIи ахэм яунагъохэм арагъэгъотырэ социальнэ IэпыIэгъум нэмыкIэу, шъолъыр фондым патриотическэ, спорт ыкIи культурнэ Iофтхьабзэхэм ветеранхэр чанэу ахегъэлажьэх.МэфэкI шIыкIэм тетэу къызэIуахыгъэ спорт зэнэкъокъум хэлажьэхэрэм шIуфэс къарахыгъ фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан, Урысы-ем спортымкIэ изаслуженнэ мастерэу Сергей Алифиренкэм ыкIи адаптивнэ спортымкIэ спорт еджапIэм ипащэу Нэгые Заур.Олимпийскэ чемпионыр къызэрафэхъохъугъэ гущыIэхэм ветеранхэм гъэхъагъэхэр ашIынхэмкIэ кIочIэ гъэнэфагъэ къаритыгъ.— Фондэу «Хэгъэгум иухъумакIохэм», тисоциальнэ координаторхэу непэ къышъуфэгумэкIхэрэм ацIэкIэ шIуфэс шъосэхы ыкIи Iофтхьабзэм шъузэрэхэлажьэрэмкIэ «тхьашъуегъэпсэу» шъосэIо. ГъэхъэгъэшIухэр шъушIынхэу ыкIи текIоныгъэр къыдэшъухынэу шъуфэсэIо. Спорт зэнэкъокъум шъузэрэхэлэжьэгъэ закъор текIоныгъэу плъытэ хъущт, — къыхигъэщыгъ ПIатIыкъо Аслъан.Зэо зэфэшъхьафхэм апхырыкIыгъэ ветеранхэр лъэныкъо зэфэшъхьафхэмкIэ зэнэкъокъугъэх. Зипсауныгъэ амалхэр зэщыкъогъэ кIалэхэм ифэшъошэ амалхэр арагъэгъотыгъэх, спортсмен-хэм зэфэдэныгъэ азыфагу илъыным анаIэ тырагъэтыгъ.Хэлэжьэгъэ пстэуми кIэух дэгъухэр къагъэлъэгъуагъэх, бгъэхалъхьэхэр, дипломхэр аратыгъэх, анахь къахэщыгъэхэр нэпэеплъ шIухьафтынхэмкIэ агъэшIуагъэх.«Хэгъэгум иухъумакIохэм я Кубок» джыри зэ къыгъэшъыпкъэжьыгъ ветеранхэм гукIочIэ лъэш зэрахэлъыр, зыкIыныгъэр ыкIи текIоныгъэр къыдэхыгъэнымкIэ пэрыохъу зэрямыIэр.Спорт зэнэкъокъум хэлэжьагъэхэм ыкIи хьакIэу къеблэгъагъэхэм апае щэрыоным щагъэфедэрэ спорт Iашэхэм якъэгъэлъэгъон къыщызэIуахыгъагъ.IЭШЪЫНЭ Сусан.