АР-м хэдзынхэмкIэ и Гупчэ комиссие тыгъуасэ зичэзыу зэхэсыгъоу иIагъэр муниципальнэ образованиехэм хэдзынхэмкIэ ячIыпIэ комиссиехэм ягъэпсын фэгъэхьыгъагъ. Iофтхьабзэр зэрищагъ Гупчэ комиссием и Тхьаматэу Сэмэгу Нурбый.
УФ-м и Къэралыгъо Думэ ыкIи АР-м и Къэралыгъо Совет — Хасэм ядепутатхэм яхэдзынхэу мы илъэсым щыIэщтхэм языфэгъэхьазырын къыдыхэлъытагъэу чIыпIэ комиссии 9 пстэумкIи республикэм щагъэпсыгъ. ХэдзынхэмкIэ Гупчэ комиссием исекретарэу ХьацIэцIэ Фатимэ ыпэрапшIэу ахэм япшъэрылъэу ыкIи яфитыныгъэу хэбзэгъэуцугъэм къыщыдэлъытагъэхэм кIэкIэу къатегущыIагъ. ЧIыпIэ комиссиехэм язэхэщэн шапхъэу пылъхэр хэзыгъэ имыIэу гъэцэкIагъэ зэрэхъугъэри ащ къыхигъэщыгъ.Нэужым муниципальнэ образованиехэм ячIыпIэ комиссие пэпчъ хэушъхьафыкIыгъэу амакъэхэр фатыгъэх. Непэ Адыгеим и Парламент хэхьэрэ партииплIымэ — «Единэ Россием», КПРФ-м, ЛДПР-м, «Справедливая Россия», къэкIощт хэдзынхэм ахэлэжьэнэу къахэхьэгъэ партиякIэу «Новые люди» зыфиIохэрэм ялIыкIохэр комиссиехэм ахэтыщтых.ХьацIэцIэ Фатимэ къызэриIуагъэмкIэ, къалэу Мыекъуапэ, Тэхъутэмыкъое ыкIи Мыекъопэ районхэм хэдзакIоу арысхэр зэрэнахьыбэм ыкIи чIыпIэу къызэлъаубытырэр зэрэнахь иным афэшI ячIыпIэ комиссиехэм нэбгырэ пшIырыпшI, адрэхэм нэбгырэ ирый ахагъэхьагъ. ЗэкIэ кандидатурэу къагъэлъэгъуагъэхэм Гупчэ комиссием хэтхэм адырагъэштагъ.Зэхэсыгъом икIэухым Сэмэгу Нурбый гущыIэр зештэм, партиехэм ялIыкIохэу чIыпIэ комиссиехэм ахэтыщтхэм якандидатурэхэм якъэгъэлъэгъонкIэ ищыкIэгъэ пстэур игъом ыкIи икъоу зэрагъэцэкIагъэм, ар IофшIэнышхоу зэрэщытым къыкIигъэтхъыгъ, «тхьашъуегъэпсэу» къариIуагъ.ХЪУТ Нэфсэт.