КаратэмкIэ Урысыем ипервенствэу Орловскэ хэкум щыкIуагъэм илъэс 12 — 13 зыныбжьхэм зыщаушэтыгъ. Iофтхьабзэм кIэщакIо фэхъугъэх УФ-м спортымкIэ и Министерствэрэ Урысыем каратэмкIэ и Федерациерэ.
Зэнэкъокъухэм къэралыгъом ишъолъыр 54-мэ къарыкIыгъэ спортсмен 600 фэдиз ахэлэжьагъ. Адыгэ Республикэр нэбгыри 6-мэ къагъэлъэгъуагъ. Ахэр тренерхэу Владимир Васильченкэм, Вячеслав Леус, Никита Попругиным агъасэх.Килограмм 54-м нэс къэзыщэчыхэрэм якуп дэгъу дэдэу зыкъыщигъэлъэгъуагъ ыкIи дышъэ медаль къыхьыгъ тишъолъыр илIыкIоу Егор Дробышевым. Джащ фэдэу Илья Официал текIоныгъэр къыдихыгъ. Килограмм 39-м нэс къэзыщэчыхэрэм якуп хэтыгъэ Пако Самир ухьазырыныгъэ дэгъу зэриIэр джыри зэ къыгъэшъыпкъэжьыгъ, чемпион хъугъэ. Ар кIэух едзыгъом Дагъыстан испортсмен щытекIуагъ.Зэнэкъокъум изэфэхьысыжьхэмкIэ, тикаратистхэм спорт разрядыкIэхэр къафагъэшъошэщтых.