ГандболымкIэ Урысыем и Суперлигэ хэт «АГУ-Адыифым» мы илъэс лъэхъанымкIэ аужырэ зэIукIэгъу иIагъ.
Мыекъуапэ ихьэкIагъ Ижевскэ къэзыгъэлъэгъорэ «Университетыр». Зэнэкъокъум изэфэхьысыжьхэмкIэ, бысымхэм турнир таблицэм я 10-рэ чIыпIэр щаубытыгъ, хьакIэхэр я 12-м щытых.Ау ащ емылъытыгъэу командэхэр текIоныгъэм фэбэнагъэх. Апэрэ такъикъхэм къащегъэжьагъэу ешIэгъур зыхьыщтыр къэшIэгъоягъ. Гандболисткэхэр ыпэкIэ илъыщтыгъэх, къэлапчъэм Iэгуаор дадзэщтыгъ. ЗэIукIэгъур аухынкIэ охътэ макIэ къэнагъэу пчъагъэр зэфэдизыгъ. Ау аужырэ такъикъхэм бысымхэр нахь лъэшэу джэгугъэх, 30:29-у текIоныгъэр къыдахыгъ. ЗэIукIэгъум иешIэкIо анахь дэгъоу къыхагъэщыгъэх Валерия Вайкумрэ («АГУ-Адыиф») Юстина Артемьевамрэ («Университет»).— Аужырэ ешIэгъум зытебгъэпсыхьаныр къины. Ащ къыхэкIэу ныбджэгъу зэIукIэгъум фэдэу ар кIуагъэ, — къыхигъэщыгъ тикомандэ итренер шъхьаIэу Никита Голуб.Зэнэкъокъур аухыгъ, джы командэхэм хэукъоныгъэхэм Iоф адашIэщт ыкIи къэкIощт ешIэгъухэм зафагъэхьазырыщт. Тикомандэ я 10-рэ чIыпIэр къыдихыгъ, ау ащ нахь лъагэу дэкIоен зэрилъэкIыщтым тицыхьэ телъ.