«Музейхэм ячэщ» Адыгеир хэлэжьагъ

Илъэс къэс зэхащэрэ мэфэкI Iофтхьабзэр хэгъэгум ишъолъырхэм зэкIэми ащыкIуагъ. ЗыкIыныгъэм и Илъэс имэхьанэ дыригъаштэу «Музейхэм ячэщ» зыфиIорэ мэфэкIым «Родное» зыфиIорэ темэр джэпсалъэу щыпхыращыгъ.

Iофтхьабзэм къыдыхэлъытагъэу АР-м и Лъэпкъ музей ыпкIэ хэмылъэу къэгъэ­лъэгъонхэр щыкIуагъэх. Лъэныкъо зэфэшъхьафхэм афэгъэхьыгъэ егъэджэн сыхьатхэр щызэхащагъэх.КъокIыпIэм щыпсэухэрэ лъэпкъхэм яискусствэхэмкIэ Къэралыгъо музееу Мыекъуапэ дэтым экскурсие хьалэмэт­хэр, егъэджэн сыхьатхэр щыкIуагъэх.АР-м и Сурэт гъэлъэгъуапIэ мастер-классхэр щырыгъэкIокIыгъэх, алырэгъу шъэнымкIэ, дышъэидэнымкIэ, пхъэшIэнымкIэ заушэтыгъ. Мыщ IэпэIасэхэри хэлэжьагъэх. Джэджэ район краеведческэ музееу П. П. Тынченкэм ыцIэ зыхьырэм программэу «Хэгъэгум изыкIыныгъ» къыгъэхьарызыгъ. Красногвардейскэ краеведческэ музеири, Адыгэкъа­лэ дэт краеведческэ музеири Iофтхьабзэм хэлэжьагъэх.Мыекъопэ районым ит краеведческэ музееу зэшъхьэгъусэхэу Жерноклевхэм ацIэкIэ щытыр «Музейхэм ячэщ» чанэу хэлэжьагъ. Музеим изэхэщакIохэм яхьы­лIэгъэ къэгъэлъэгъон баеу «Основатели музея» зыфиIорэр цIыфхэм арагъэлъэгъугъ.«Сэ сыщыIэщт» зыфиIорэ Iоф­тхьабзэр Андырхъое Хъусен ыцIэ зыхьырэ музеим щыкIуагъ. ЛIыхъужъэу Андырхъое Хъусенэ ихэгъэгу къыухъумэзэ лIыблэнагъэу зэрихьагъэр къыщаIотагъ. «Мы Iофтхьэбзэ шIагъор — рес­публикэ гупсэм итарихърэ икультурэрэ нахь дэгъоу зэгъэшIэгъэнхэмкIэ, мыщ щыпсэурэ лъэпкъхэм афэгъэхьыгъэу кIэ горэ пшIэнымкIэ , уахътэр гъэшIэгъонэу ыкIи шIуагъэ хэлъэу бгъэкIонымкIэ джыри зы амал», — къыхигъэщыгъ Адыгеим и ЛIышъхьэу КъумпIыл Мурат.Музейхэм ащыкIогъэ Iофтхьабзэхэм ыпкIэ амытэу искусствэм пыщагъэ нэбгрэ мини 5 фэдиз яплъыгъ. МэфэкI дахэу «Музейхэм ячэщ» Адыгеим зэфэ­дэкIэ шIуагъэ къытэу щыкIуагъ.Лъэпшъыкъо Фатим.