ЧIыгу Iахь зиIэхэм ашIэн фае

Дачэхэм яуахътэ къихьагъ. Ащ фэшI чIыгу Iахьхэм ягъэфедэн фэгъэхьыгъэ хэбзэгъэуцугъэм фашIыгъэ зэхъокIыныгъэу блэкIыгъэ илъэсым кIуачIэ зиIэ хъугъэхэр джыри зэ шъугу къэдгъэкIыжьхэмэ тшIоигъу.

ЧIыгу Iахь зиIэхэм ар амыгъэфедэу къэзыгъэлъэгъорэ шапхъэхэм 2025-рэ илъэсым иIоныгъо и 1-м къыщыубла- ­гъэу кIуачIэ яIэ хъугъэ. Ар псэупIэхэм, чъыгхэтэ товариществэхэм чIыгу ащызиIэхэм зэкIэми анэсы. ШэпхъакIэхэм лъапсэ афэхъугъэр УФ-м и Правительствэ блэкIыгъэ илъэсым ижъоныгъокIэ мазэ и 31-м къыдигъэкIыгъэ унашъор ары.ЧIыгур зием ымыгъэфедэу къэзыгъэлъэгъорэ шапхъэхэр:— чIыгум ызыныкъом нахьыбэ хэкIым зэлъиубытыгъэу, ар илъэ­сым Iуимыхыгъэмэ;— псэуалъэ щашIынэу агъэпсыгъэу, ау илъэси 5-м къыкIоцI зыпари тырамышIыхьагъэмэ;— унэ щашIынэу агъэпсыгъэу, ар илъэси 7-м рамыгъэжьагъэмэ;чIыгу Iахьым псэуалъэ е унэ тырашIыхьагъэми, ар зэрифэшъуа­шэм тетэу аIыгъын фае. ГущыIэм пае, унашъхьэр зэхэуагъ, шъхьаныгъупчъэхэр хэлъыжьы­хэп е апчхэр къутагъэх. Мыхэри чIыгу Iахьыр зием ымыгъэфедэу къэзгъэлъэгъорэ шапхъэхэм ащыщых.— чъыгхатэ, хатэ, щагу зыфэпIощтхэри уц шIойхэм зэлъакIу хъущтэп. ЧIыгу Iахьым ызыныкъом нахьыбэр уц шIоеу метрэ фэдиз зилъэгагъэ хъугъэхэм, ежь-ежьырэу къэкIыгъэ чъыг­хэм, куандэхэм зэлъакIугъэмэ, амыгъэфедэхэрэм ахалъытэщт.ЧIыгур зием ушъхьагъу гъэнэфагъэ иIэу ар ыгъэфедэн ымылъэкIынэу къызэрэхэкIырэр къыдалъытэзэ, шапхъэу зигугъу къэтшIыгъэхэм къызщахимыубытэщт чIыпIэхэри хэбзэгъэуцугъэм щагъэнэфагъэх. Ахэр:— чIыгу Iахьыр зием ыгъэфедэн фимытэу хьыкумым е нэмыкI къэралыгъо къулыкъу рихъухьагъэмэ;— ом къыздихьыгъэ тхьамыкIагъо горэм, гущыIэм пае, псыкъи­уным, жьыбгъэшхом, машIом, нэмыкIхэм апкъ къикIэу ыгъэфедэн ымылъэкIыгъэмэ;нэмыкIэу зызшIобгъэнэн умылъэ­кIыщт ушъхьагъу горэ иIэмэ. ГущыIэм пае, псэолъэшIыныр ыухынымкIэ пэрыохъу къыфэхъугъэр хьыкумым къыщиушыхьатыжьышъугъ.Хэукъоныгъэр Росреестрэр е чIыпIэ зыгъэIорышIэжьыпIэм иуполномоченнэ къулыкъу къыхэзгъэщын фаер. ЧIыгу Iахьыр зием ымыгъэфедэу агъэунэфыгъэмэ, IофшIэнхэр щыригъэжьэнхэу пIэлъэ гъэнэфагъэ зэрэратырэр зэрытхэгъэ тхылъыр фагъэхьыщт. Ар ымыгъэ­цакIэмэ, административнэ Iоф къыфызэIуахыщт ыкIи ар хьыкумым ратыщт.ЧIыгур Iахынэу изыхъухьан зылъэ­кIыщтыр хьыкумыр ары. Ащ фэдэ зэфэхьысыжь ащ зишIыкIэ, «публичнэ» сатыукIэ чIыгу Iахьыр ащэжьыщт. Ахъщэу къыкIэкIуагъэм сатыум игъэхьазырын ыкIи изэхэщэн пэIухьагъэр хагъэкIынышъ, къэнагъэр чIыгур зиягъэм ратыжьыщт.«ЧIыгур къэкIуапIэу щыт, бгъэ­къэбзэн, зэрищыкIагъэм тетэу бгъэфедэн фае. Ар IыгъэкIы хъу­мэ, цIыфэу къыкIэлъырысхэм ямызакъоу, къэралыгъом зэрэщытэу зэрар къыфехьы, — къыхигъэщыгъ Росреестрэм АР-мкIэ и ГъэIорышIапIэ ипащэ иIэнатIэ зыгъэцакIэрэ Къуижъ Эдуард. — Арышъ, Адыгеим щыпсэоу чIыгу Iахь зиIэхэм зэкIэми неущ ащ федэ къафихьыным, ыгъэгушIонхэм, Iофыгъо къыпымыкIыным афэшI, непэ анаIэ тырагъэтынэу къяс­Iомэ сшIоигъу».