Пыдзэфэ пытэхэм ядэщын фэгъэзэгъэ шъолъыр операторым экологиер зэщызыгъакъохэрэм якъычIэгъэщын фытегъэпсыхьэгъэ Iофтхьабзэу «Видеоохота на эконарушителей» зыфиIорэр ригъэжьагъ. ЖъоныгъуакIэм и 22-м нэс ар республикэм щыкIощт.Гъэтхэ ыкIи гъэмэфэ уахътэм псэолъэшIыным къыпыкIыгъэ хэкIыр, автомашинэ щэрэхъхэр, чъыг къутамэхэр, куандэу, уц шIоеу раупкIыхэрэр, нэмыкI пыдзафэхэр хэбзэнчъэу къызэрэратэкъухэрэр нахьыбэ мэхъу. Ащ фэдэ хэкIыр гъэбылъыгъэу къыдэзыщыхэрэм апэ къифэрэ контейнерхэм аратэкъулIэ, унэхэм ачIэсхэу ахэр зыфагъэуцугъэхэр ямыкIолIэжьышъунхэу ашIы.Iофтхьабзэм имурадыр хэукъоныгъэ зышIыгъэхэр къыхэгъэщыгъэнхэм имызакъоу, республикэм щыпсэухэрэр къыхэлажьэхэзэ, ащ фэдэ хэкIитэкъупIэхэр нахь макIэ шIыгъэнхэр ары. Пыдзафэхэр хэбзэнчъэу изытэкъурэр гъэунэфыгъэ хъумэ, ащ зигъэбылъыжьышъущтэп, пшъэдэкIыжь зэрэрагъэхьыщтым Iо хэлъэп.Мы Iофтхьабзэм Адыгеим щыпсэоу шIоигъоныгъэ зиIэр зэкIэ къыхэлэжьэнхэ алъэкIыщт. Ащ фэшI зигугъу къэтшIыгъэ пыдзафэхэм ащыщ контейнерхэр зытет площадкэм къыритэкъулIэу, экологиер зэщызгъакъорэр алъэгъумэ, ащ видео тырахын фае. Транспортым икъэралыгъо номер дэгъоу къэлъэгъоныр шIокI зимыIэ Iофэу шапхъэхэм ащыгъэнэфагъ.Джащ фэдэу мафэу ыкIи уахътэу видео зыщытырахыгъэр, чIыпIэу хэукъоныгъэр зыщагъэунэфыгъэр зэхэугуфыкIыгъэу къыщыIогъэн фае. Мыщ фэдэ материалэу шъолъыр операторым къыIэкIахьэхэрэр лъыплъэкIо ыкIи хэбзэухъумэкIо къулыкъухэм аIэкIигъэхьащтых. Экологиер ащ тетэу зэщызыгъакъохэрэм атезыхыхэрэм сомэ 1000 шIухьафтын афашIыщт.Видеоматериалхэр электроннэ почтэмкIэ къэжъугъэхьынхэ шъулъэкIыщт. Мары адресыр: conkurs01@clean-rf.ru.
«ЭкоЦентрэм» и Адыгэ шъолъыр къутамэ ипресс-къулыкъу