Ыбзи ихабзи илъапI

ТхакIоу ШэкIо Щэбан ыкъом Абрек ыныбжь илъэс 83-рэ зэрэхъугъэр хигъэунэфыкIыгъ. Илъэс пчъагъэ­хэм ар илъэпкъ хьалэлэу фэлэжьэгъэ кIэлэегъадж, усакIу, журналист, общественнэ IофышI.

ЫшIагъ унэгъо гупсэф, илъфыгъэхэри гъогу занкIэ тырищагъэх, щыIэныгъэм игуапэу сыдигъуи ар хэт, ибынхэри гъогу зафэ рэкIох.ШэкIо Абрек кIэлэцIыкIу усакIу, тхылъи 10 фэдиз къыдигъэкIыгъ, ащкIэ зэрилъэ­кIэу Iоф ышIагъ ыкIи ешIэ. Ау итхэн-гупшысэн къезгъэблыгъэр иадыгабзэ, адыгэ литературэр псэ пытэ хъунхэр арэу сеплъы. ФэлъэкIэу, фызэшIокIырэри макIэп, шIур епхъы.

ЖъоныгъуакIэм и 13-м, Адыгэ рес­публикэ ныбжьыкIэ тхылъеджапIэм ипчъэхэр хьакIэхэм афызэIухыгъагъ, усакIом фэгъэхьыгъэ мэфэкI зэхахьэм цIыфыбэ къызылъищагъ. Адыгэ респуб­ликэ гимназием икIэлэеджакIохэр, Абрек икъуаджэу Джамбэчые къикIыгъэ еджэкIо цIыкIухэр, Джамбэчые еджапIэм хэт этнографическэ музееу, зэлъашIэрэ кIэлэегъэджагъэу, тхакIоу Бахъукъо Ерэджыбэ зэтыригъэпсыхьэгъагъэм иIофышIэу Къэзэнч Нурет.Адыгэ чылэ пэпчъ цIыф IэпэIэсабэ дэс, ахэм ащыщ Абрек икъоджэгъу IэпэIасэу ЛIышэ Ахьмэд. МэфэкIым хэлэжьагъэх АКъУ-м ишIэныгъэлэжьэу Хъуажъ Нурет, тхакIоу ГутIэ Санят, гуманитар ушэтынхэмкIэ Адыгэ респуб­ликэ институтэу Т. КIэращэм ыцIэ зыхьырэм ишIэныгъэлэжьхэу бзэм ыкIи IорIотэ отделхэм ачIэсхэр, ныбжьыкIэ тхылъеджапIэм иIофышIэхэр, журналистхэр.Iофтхьабзэр зэрищагъ филологие шIэныгъэхэмкIэ докторэу, институтым иIорIотэ отдел ишIэныгъэлэжь шъхьаIэу Къуекъо Асфар.

МэфэкI зэхахьэм шIуфэс пэублэ гущыIэ кIэкI къыщишIыгъ Адыгэ республикэ ныбжьыкIэ тхылъеджапIэм ипащэу ХьакIэмызэ Мадинэ. УсакIоу, тхакIоу, журналистэу ШэкIо Абрек фэгъэхьыгъэ мэфэкI Iоф­тхьабзэр ятхылъеджапIэ зэрэщыкIощтыр зэригуапэр, ар зигукъэ­кIэу, зыгъэхьазырыгъэу, усакIом ышыпхъоу ШэкIо Мирэ ныбжьыкIэ республикэ тхылъеджапIэм ныб­джэгъушIоу зэриIэр зэригуапэр къыIуагъ.Iофтхьабзэр къагъэшъошIуагъ Адыгэ Хасэм итхьаматэу ЛIымыщэкъо Рэмэзанрэ ащ илъэсыбэ хъугъэу хэт МэщфэшIу Нэдждэтрэ. Рэмэзан псэлъэ кIэкI гуапэ зэхахьэм къыщишIыгъ. ШэкIо Абрек ицIыфыгъэ хабзэкIи, итхэкIэ- усакIэкIи, узкIырыплъынэу, бэмыIо башIэу зэрэщытыр кIигъэтхъыгъ. Жъы уимыIэу, кIэ уиIэщтэп зэраIорэм елъытыгъэу, адыгэхэм къахэкIыгъэ нахьыжъхэу — Шъхьэ­лэхъо Абу, ХьэдэгъэлIэ Аскэр, Гъыщ Нухьэ, нэмыкIхэу зафэу лэжьагъэхэм Абрек анахьыкIэми, ахэм иIушыгъэ-хъуп­хъагъэкIэ агуигъэуцуагъ, иусэхэм игуапэу зэряджэрэр, бзэр пшIэныр зэрэнасыпыгъэр кIигъэт­хъыгъ. Ухэтми узэригъэплъыжьэу Абрек Iэдэб зэрэхэлъыр, игущыIи фэсакъэу зэрилэжьырэр, ытхырэм купкI зэриIэр къаIуагъ къэгущыIагъэхэм.Зэхахьэм хэлэжьэгъэ кIэ­лэеджакIохэр ШэкIо Абрек иусэхэм IупкIэу къяджа­гъэх, ахэм адыгабзэр дахэу агъэ­жъынчыгъ.Джащ фэдэу шIэныгъэлэжьхэу ЕмтIылъ Разыетрэ Цуекъо Нэфсэтрэ къэгущыIагъэх. Разыет тхакIоу ШакIор ыкIи ащ ишъхьэгъусэу Хъаныет (щыIэжьэп, Тхьэм джэнэт къырет) илъэс 50 фэдиз хъу­гъэу зэришIэхэрэр, ахэм адыгагъэр зэрахьэу, цIыфышIухэу зэрэзэдэпсэугъэхэр къы­Iуагъ. Абрек шъэбагъэр, гукIэгъур къе­бэ­­кIэу зэрэтхэрэр, Ным иобраз дахэу иусэхэм къызэра­щытыгъэр хигъэунэфыкIыгъ.Филологие шIэныгъэхэмкIэ докторэу, институтым IорIуатэмкIэ иотдел ипащэу Цуекъо Нэфсэт ШакIом итворчествэ IорIуатэр зэрэщыгъэфедагъэм тхылъэу «Унагъом сабый къихъуагъэмэ…» зыфиIорэр иIэубытыпIэу гущыIэ къышIыгъ.ШэкIо Абрек итворчествэ лъэныкъо зэфэшъхьафхэмкIэ гъэзагъэу — Хъуажъ Нурет — публицистикэм, Атэжьыхьэ Сайхьат — иусэхэм ялъэпIагъэ, Тэу Нуриет — тхылъэу «Симаф» зыфиIорэм чIыопсымкIэ сабыйхэм шIэныгъэ хагъуа­тэу зэрэщытыр, Галина Луганскаяр — тхакIом иусэ-орэдхэм сабыимкIэ шIуагъэу яIэр, институтым ишIэныгъэ IофышIэ ныбжьыкIэу Уджыхъу Айтэч — сабыйхэм уафэусэныр зэрэгъэшIэгъо­ныр, зэрэIэпэIэсагъэр ыкIи насыпыгъэр къыраIотыкIыгъ.МэщфэшIу Нэдждэти Абрек иусэ игуапэу къеджагъ.Литературнэ мэфэкIэу ШакIом фэгъэ­хьыгъэр джащ фэдэу къызэкIэлъыкIуагъ, ащ хэлэжьагъэхэр псауныгъэкIэ, творческэ гъэхъагъэхэмкIэ фэлъэIуагъэх тхакIом.МамырыкъоНуриет.