Лъэпшъыкъо Ф.
Адыгэ Республикэм и Къэралыгъо академическэ ансамблэу «Налмэсымрэ» Къалмыкъым къашъомкIэ и Къэралыгъо театрэу «Ойраты» зыфиIорэмрэ концертэу «Сердца двух культур» зыфиIорэр къызэдатыгъ.
Ар лъэпкъ искусствэм имэфэкI шъыпкъэ хъугъэ. «Налмэсыр» зызэхащагъэр мыгъэ илъэс 90-рэ зэрэхъурэм ипэгъокIэу Iофтхьабзэр рагъэкIокIыгъ.Искусствэр лъагэу зыIэтыхэу, къэзыухъумэхэу ыкIи лъызыгъэкIуатэхэрэ ансамблитIум лъэпкъ кIэныр къаухъумэ.Апэрэ пычыгъом «Налмэсым» къэшъо программэ гъэшIэгъон къыгъэлъэгъуагъ. Лъэпкъ искусствэм идэхагъэ цIыфхэм зэхашIэным, агу къинэжьыным иамалхэр рихьылIагъэх.
ЯтIонэрэ пычыгъом театрэу «Ойраты» концертыр лъигъэкIотагъ. ЦIыфэу къекIолIагъэхэр Къалмыкъым икультурэ бай идунай хащагъэх. Къашъо пэпчъ тарихъ псау зэрэпылъым, орэд пэпчъ лъэпкъым ыпсэ изы Iахьэу зэрэщытым гукIэ лъыIэсыгъэх. «Гъэмаф», «Улан Залата», «Къэпсаужьыгъэ тхыдэжъ», «БзыуитIу якъэбар» зыфиIорэ къашъохэр Къалмыкъ купым дахэу къышIыгъэх.— Къалмыкъым культурэмкIэ и Министерствэ ыкIи тикуп ацIэкIэ ансамблэу «Налмэсым» сыфэгушIо сшIоигъу. Творческэ илъэсэу къызэринэкIыгъэхэм къакIоцI ащ щытхъубэ къылэжьыгъ, анахь шъхьаIэр — цIыфхэм яшIулъэгъу. Купым итворческэ кIэн Адыгеим имызакъоу, Урысыем культурэмкIэ идышъэ фонд хэхьагъ. Ар икъэшъо гъэуцукIэкIэ, итеплъэкIэ ыкIи зыми хэмыкIокIэрэ къашъомкIэ къашIэжьы. Тикупхэм язэкъошыныгъэ орэпытэ»! — къыIуагъ театрэу «Ойраты» ибалетмейстерэу Владимир Надбитовым.
— Ти Хэгъэгу зэрэдахэм ишыхьатэу непэ сценэм лъэпкъитIу щызэIукIагъ. Урысыем щыпсэухэрэм языкIыныгъэрэ язэкъошыныгъэрэ къэралыгъом ыкIуачI. «Налмэсыри» ткъош Къалмыкъым щылэжьэрэ «Ойратыри» культурнэ кIэныр къэухъумэгъэным фэлажьэх. Мэкъуогъум и 18-м «Налмэсыр» зызэхащагъэр илъэс 90-рэ зэрэхъурэр хигъэунэфыкIыщт, зэкIэми ащ шъукъесэгъэблагъэ, — къыIуагъ «Налмэсым» ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан.Лъэпшъыкъо Фатим.