СамбэмкIэ Европэм ичемпионатэу Грузием икъэлэ шъхьаIэ щыкIуагъэм къэралыгъо зэфэшъхьафхэм яспортсмен 300 хэлэжьагъ.
Килограмм 64-м нэс къэзыщэчыхэрэм якуп хэтыгъэ Адыгэкъалэ щыщ ЦIыкIу Рэмэзан ухьазырыныгъэ дэгъу къыгъэлъэгъуагъ, тыжьын медаль къыфагъэшъошагъ.Зэнэкъокъум ипэшIорыгъэшъ едзыгъохэм Рэмэзан техникэ дахэ къащигъэлъагъозэ Нидерланды, Белоруссием ыкIи Азербайджан ялIыкIохэм ащатекIуагъ. Ащ пэпчъ финалым нахь пэблагъэ хъущтыгъ.КIэух едзыгъом тибэнакIо турнирым ибысымэу Авто Мукбанияани щыIукIагъ. Мызыгъэгум Грузием илIыкIо нахь лъэшыгъ. ЦIыкIу Рэмэзан ятIонэрэ чIыпIэр къыдихыгъ, ащ игъэхъагъэ адыгэ спортым итарихъ хэхьащт.
Урысыем ихэшыпыкIыгъэ командэ хэтхэм хагъэунэфыкIырэ чIыпIэ 13 къафагъэшъошагъ: дышъэ медалэу — 8, тыжьынэу — 2 ыкIи джэрзэу — 3. Команднэ зэнэкъокъум апэрэ чIыпIэр къыщыдихыгъ. Мы спорт лъэпкъымкIэ пэрытныгъэ зыIыгъ къэралыгъоу зэрэщытыр джыри зэ къыгъэшъыпкъэжьыгъ.Гъэхъэгъэшхо зышIыгъэ спортсменым къыфэгушIуагъ АР-м и ЛIышъхьэу КъумпIыл Мурат.— Рэмэзан мафэ къэс зызэригъэсагъэм, ыкIуачIэ зэрэрихьылIагъэм, ащ итренерхэм яIофшIэн зэрифэшъуашэу зэрагъэцэкIагъэм Европэм ичемпионат итыжьын медаль къыкIэлъыкIуагъ. Тиспортсмен тапэкIи текIоныгъакIэхэр къыдихынхэу фэсэIо, — къащитхыгъ республикэм ипащэ социальнэ хъытыухэм.ЦIыкIу Рэмэзан бэнэныр зыщыригъэжьагъэр Адыгэкъалэ дэт кIэлэцIыкIу-ныбжьыкIэ спорт еджапIэр ары. Апэрэ лъэбэкъухэр спортым щезыгъэшIыгъэхэр АР-м изаслуженнэ тренерэу Шъэумэн Байзэт. Непэ Рэмэзан Урысыем спортымкIэ имастер, самбэмкIэ дунаим ипервенствэ тыжьын медаль къыщыфагъэшъошагъ, къэралыгъо ыкIи дунэе мэхьанэ зиIэ зэнэкъокъухэм дышъэ медальхэр ыкIи хагъэунэфыкIырэ чIыпIэхэр къащыдихыгъэх, тызэрыгушхо спортсменхэм ащыщ.