Тэу З.
Адыгэ-абхъаз литературнэ фестивалэу «Строфы на Руфабго» зыфиIорэм изичэзыу, я 3-рэ зэхахьэ псэупIэу Гавердовскэм дэт культурнэ хэхъоныгъэм и Гупчэу «Ошъадэм» щызэхащагъ. Абхъаз усакIоу, зэдзэкIакIоу, абхъаз тхакIохэм я Союз хэтэу Гунда Сакания итворческэ зэIукIэ щыкIуагъ. Адыгеим ибзылъфыгъэхэм я Союз Iофтхьабзэм кIэщакIо фэхъугъ.
АР-м ижуналистхэм я Союз ипащэу ТIэшъу Светланэ зэIукIэр зэрищагъ. МэфэкIыр «Синдикэм» иартистхэм лъэпкъ къашъомкIэ къызэIуахыгъ. Нэужым пчэгум къырагъэблэгъагъ творческэ пчыхьэзэхахьэр зыфызэхащэгъэ Гунда Сакания. УсакIом ишIуфэс гущыIэхэр адыгабзэкIэ къыIуагъ. Абхъаз заом хэлэжьэгъэ адыгэ лIыхъужъхэм афэгъэхьыгъэ усэм къеджагъ. Адыгеим итхэкIо цIэрыIоу МэщбэшIэ Исхьакъ иусэ, абхъаз усакIохэм ыкIи ежь иусэхэм къяджагъ.
— Адыгэ чIыгум сырихьакIэныр, абхъаз псалъэр Адыгеим щыIуныр сэркIэ насыпыгъ. Анахьэу непэ къыхэзгъэщымэ сшIоигъор адыгэ ыкIи абхъаз лъэпкъхэм язэкъошыныгъэ зэрэлъэшыр ары. Сэ сыусакIу, сызэрытхэрэр абхъазыбзэр ары. Сыфай сыбзэ ымакъэ чыжьэу Iунэу,— къыIуагъ усакIом.Джащ фэдэу Гунда Сакания игъусэу къэкIогъэ сурэтышIэу Анна Сангулия фэбагъэ хэлъэу зэхахьэм къыщыгущыIагъ. Адыгэ-абхъаз усэхэм фэбагъэрэ зэкъошныгъэрэ къабгъодэкIэу фестивалым хэлэжьагъэхэр зэкIэ ыумэхъыгъэх. Нэпэеплъ сурэтхэр зытырахыгъэх.— Адыгэхэм ыкIи абхъазхэм тыгукIи, тпсэкIи тизэхашIэ лъэшы. Ар непэ къежьагъэп, ар лъым хэлъ. УсакIом сыд ыгу къыдэзгъэчъырэр? Дахэу, дэгъоу ылъэгъурэр, гуфэбэныгъэу зэхишIэрэр ары. ДунэееплъыкIэу тиIэм зедгъэушъомбгъун фае. ЦIыф лъэпкъ зэфэшъхьафхэр мамырэу зэдэпсэунхэм пае ахэр зэрэшIэнхэ фае, — къыIуагъ Адыгеим ибзылъфыгъэхэм я Союз итхьаматэу Вэрэкъо Хьалимэт.Фестивалым иятIонэрэ мафэ непэ псыкъечъэхыпIэу Рыфабгъо щыкIощт. Абхъазым къикIыгъэ хьакIэхэр Iофтхьабзэм хэлэжьэщтых. Фестивалым хэлэжьэрэ журналистхэр, усакIохэр усэхэм къяджэщтых, зэпхыныгъэр агъэпытэщт.Лъэпшъыкъо Фатим.