Мыекъопэ «Зэкъошныгъэм» илъэс пчъагъэрэ щешIэгъэ, ащ хэтэу къэлапчъэм Iэгоуи 115-рэ дэзыдзэгъэ Анатолий Абрамовым ыцIэкIэ зэхащэрэ зэнэкъокъур рагъэжьагъ. 1999-рэ илъэсым къыщегъэжьагъэу футболист цIэрыIом и Кубок икъыдэхын командэ зэфэшъхьафхэр хэлажьэх.
Iофтхьабзэм кIэщакIо фэхъугъэх Адыгеим футболымкIэ и Федерациерэ АР-м физическэ культурэмкIэ ыкIи спортымкIэ и Комитетрэ. Мы спорт лъэпкъыр зыгу рихьыхэрэм социальнэ хъытыухэм яамалхэр къызфагъэфедэзэ ешIэгъухэм занкIэу яплъынхэ алъэкIыщт. Судьяхэр Краснодар къыращыгъэх, текIоныгъэр ыкIи хагъэунэфыкIырэ чIыпIэхэр къыдэзыххэрэм ахъщэ шIухьафтынхэр афагъэшъошэщтых.Зэнэкъокъум иплей-офф иапэрэ едзыгъо гъэшIэгъоу кIуагъэ. Командэхэм зэIукIэгъуи 8 яIагъ, къэлапчъэм Iогоо 41-рэ дадзагъ. Мы турнирым гъогогъуихрэ текIоныгъэр къыщыдэзыхыгъэ «Ошъутенэр» 6:4-у «Спортмастерым» нахь лъэшыгъ. Джы ар «Факелым» дешIэщт.
Финалым и 1/8-м къыдыхэлъытэгъэ ешIэгъухэм язэфэхьысыжьхэр:«Ошъутен» — «Спортмастер» — 6:4, «Факел» — «Альянс» — 4:1, «Ансар» — «Джаджэ» — 3:2, «МФОК-у Ошъутен» — «Спортмастер-3» — 5:1, «Легион» — «Запереездовские» — 3:3 (4:2 пенальтикIэ), «Оазис» — «Алиро» — 1:0, «Спорт-мастер-2» — «Канониры» — 2:1, «Кавказ» — «Зэкъошныгъ» — 4:1.Финалым и 1/4-м щызэIукIэщтых:«Ошъутен» — «Факел», «Ансар» — «МФОК-у Ошъутен», «Легион» — «Оазис», «Спортмастер-2» — «Кавказ».ЕшIэгъу гъэшIэгъонхэм шъуяплъынэу зэхэщакIохэм шъурагъэблагъэ, ахэр стадионэу «Юность» зыфиIорэм щыкIощтых.