Футбол цIыкIумкIэ ветеранхэм якомандэхэм язэнэкъокъу мы мафэхэм рагъэкIокIыгъ. Зыныбжь илъэс 40-м ехъугъэхэр ары зызыушэтыгъэхэр. Iофтхьабзэм кIэщакIо фэхъугъ Мыекъуапэ физическэ культурэмкIэ ыкIи спортымкIэ и Комитет.
Турнирым хэлэжьагъэх командэхэу «ВНГ», «Делотехника», «Джокер», «Альфа-Юг» зыфиIохэрэр.«ВНГ-м» ешIэкIэ дахэ къыгъэлъэгъуагъ, изэIукIэгъухэр зэкIэ къыхьыгъэх ыкIи къытефэу зэнэкъокъум апэрэ чIыпIэр къыщыдихыгъ. «Делотехникэмрэ» «Альфа-Югымрэ» очко пчъагъэу рагъэкъугъэр зэфэдиз, ежь командэхэм язэIукIэгъу 0:0-у аухыгъ. Ащ къыхэкIэу ятIонэрэ чIыпIэр къыдэзыхыщтыр къэзыгъэнэфагъэр къэлапчъэм Iэгоо пчъагъэу дадзагъэмрэ къафыдадзагъэмрэ япчъагъ. АщкIэ «Делотехникэм» къэгъэлъэгъон нахь дэгъу иIэу къычIэкIыгъ ыкIи ятIонэрэ хъугъэ. «Альфа-Югым» хэтхэм джэрз медальхэр афагъэшъошагъэх.ЗэхэщакIохэм турнирым иешIэкIо анахь дэгъухэр къыхагъэщыгъэх. Къэлапчъэм анахьыбэу Iэгуаор дэзыдзагъэр Нэхэе Нухь, ухъумэкIо анахь дэгъур — Бзэджэжъыкъо Азэмат, къэлэпчъэIут анахь дэгъур — Михаил Никитиныр. Мы футболистхэм хэушъхьафыкIыгъэ шIухьафтынхэр афагъэшъошагъэх.