Теннис цIыкIумкIэ Адыгэ Республикэм ихэшыпыкIыгъэ командэ тарихъ мэхьанэ зиIэ гъэхъагъэ ышIыгъэу Чэчэн Республикэм икъэлэ шъхьаIэ къикIыжьыгъ. Шъолъырхэм азыфагу зэхащэрэ зэнэкъокъоу «Шаг в будущее — СКФО» зыфиIорэр зыщыIэм къыщегъэжьагъэу апэрэу хагъэунэфыкIырэ чIыпIэ тиспортсменхэм къахьыгъ. Турнирым зыныбжь илъэс 16-м емыхъугъэ кIалэхэр ыкIи пшъашъэхэр хэлэжьагъэх.
Къалэу Грознэм мэфищым къыкIоцI щыкIогъэ зэнэкъокъухэм Ставрополь ыкIи Краснодар крайхэм, Къэбэртэе-Бэлъкъарым, Къэрэщэе-Черкесым, Дагъыстан, Темыр Осетием — Аланием, Донецкэ Народнэ Республикэм, Чэчэным ыкIи Адыгеим ялIыкIохэр ахэлэжьагъэх, медальхэм афэбэнагъэх. Артем Вариводиным, Бзаго Дамир, Кирилл Панькиным, Дарья Кузнецовам, Бзаго Даринэ ыкIи Пелагея Калининам Адыгеир къагъэлъэгъуагъ. Ахэм команднэ ыкIи унэе зэнэкъокъухэм защаушэтыгъ.
Республикэм ибзылъфыгъэ командэ гъэхъагъэ ышIын ылъэкIыгъ. Типшъашъэхэм къатекIуагъэх Ставрополь ыкIи Краснодар крайхэм ялIыкIохэр. Адрэхэм зэкIэми къашIуахьыгъ ыкIи къатефэу ящэнэрэ чIыпIэр къыдахыгъ. КIалэхэм медаль къахьын алъэкIыгъэп, ахэр яхэнэрэ хъугъэх.Унэе зэнэкъокъухэм ахэлэжьэгъэ Кощхьэблэ районым ипсэупIэу Вольнэм щыщ Дарья Кузнецовам ухьазырыныгъэ дэгъу къыгъэлъэгъуагъ. Ащ очко закъо шIозыхьыгъэр зэнэкъокъум текIоныгъэ къыщыдэзыхыгъэ Виктория Сидоровар ары. Типшъашъэ ящэнэрэ чIыпIэм фэбанэзэ Амина Жабоевам IукIагъ ыкIи 3:0-у текIуагъ. Адыгеим икомандэ джэрз медаль къыхьыгъ. КIалэхэм язэнэкъокъу анахь щылъэшыгъ къалэу Ессентуки щыщ Андрей Бурак. Республикэм испортсменэу Артем Вариводиным ябгъонэрэ чIыпIэр ыубытыгъ.ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм кубкхэр, щытхъу тхылъхэр ыкIи медальхэр афагъэшъошагъэх.Зэнэкъокъоу «Шаг в будущее — СКФО» зыфиIорэм едзыгъуиплI къыдыхэлъытагъ. Ахэм язэфэхьысыжьхэмкIэ командэ анахь дэгъуищмэ ыкIи спортсмен анахь лъэшищмэ ахъщэ шIухьафтынхэр аратыщтых. Турнирым ишIухьафтын фонд сомэ мин 500 мэхъу.Зэнэкъокъум иящэнэрэ уцугъо Iоныгъом къалэу Ессентуки щыкIощт. Тиспортсменхэм тапэкIи гъэхъагъэхэр ашIынхэу афэтэIо.