ТекIоныгъэм ия 81-рэ илъэс фэгъэхьыгъэ я VII-рэ Мыекъопэ кушъхьэфэчъэ фестиваль мы мафэхэм рагъэкIокIыгъ. Iофтхьабзэм шIэжьыр щагъэлъэпIагъ, лIэужхэр зэрипхыгъэх.
Къэлэ паркым дэт шахматнэ клубым дэжь нэбгыри 100 фэдиз къыщызэрэугъоигъ. Ахэм кIэлэцIыкIухэри, спортым иветеранхэри ахэтыгъэх, аныбжь елъытыгъэу купи 8-у гощыгъагъэх.Купэу «илъэс 35-рэ зыныбжьхэр ыкIи нахьыжъхэр» зыфиIорэм нахьыбэмэ зыщаушэтыгъ. Ахэр зэрэзэнэкъокъугъэхэм дакIоу, япсауныгъэ агъэпытагъ, зэрэгъэчэфыгъэх.Iофтхьабзэм кIэщакIо фэхъугъэх Мыекъуапэ физическэ культурэмкIэ ыкIи спортымкIэ и Комитетрэ кушъхьэфэчъэ спортымкIэ олимпийскэ резервым испорт еджапIэрэ.
Зэнэкъокъум анахь дэгъоу зыкъыщызыгъэлъэгъуагъэхэм шIэжь медальхэр ыкIи дипломхэр афагъэшъошагъэх. Я VII-рэ Мыекъопэ кушъхьэфэчъэ фестивалыр зэфашIыжьыгъ, ау къэкIорэ илъэсым жъоныгъуакIэм кушъхьэфэчъэ спортыр зыгу рихьыхэрэр мы чIыпIэм джыри щызэрэугъоищтых, заушэтыщт.