ЕмтIылъ Нурбый ишIэжь агъэлъэпIагъ

Адыгэ Республикэм изаслуженнэ журналистэу, тиIофшIэгъугъэу ЕмтIылъ Нурбый ишIэжь фэгъэхьыгъэу футболымкIэ зэнэкъокъухэр мы мафэхэм зэхащагъэх. ИлъэсипшI пчъагъэхэм спортым ыкIи культурэм афэлэжьэгъэ журналист цIэрыIом шъхьэкIафэ фашIызэ Iофтхьабзэм команди 5 хэлэжьагъ.

Шъугу къэдгъэкIыжьын, ЕмтIылъ Нурбый илъэс 40-м ехъурэ «Адыгэ макъэм» щылэжьагъ. Спортым, культурэм, общественнэ щыIакIэм афэгъэхьыгъэу тхэщтыгъ, ащ икъэ­лэмыпэ къычIэкIыгъ тхыгъэ бэдэ­дэ, футбольнэ ешIэгъухэм къаще­гъэ­жьагъэу адыгэ лъэпкъ джэгукIэхэм анэс. Спортсменхэм, тренерхэм журналистыр дэгъоу ашIэщтыгъ, пстэуми яныбджэгъу­шIугъ.2023-м ыныбжь илъэс 73-м итэу Нурбый идунай ыхъожьыгъ, ау кIэн бай къыгъэнагъ. Адыгеим ижурналистхэм я Сююз хэтхэм агу къызэрэкIыжьырэмкIэ, ащ сыдигъуи зэфагъэ, шъыпкъагъэ хэлъыгъ, хъугъэ-шIэгъэ шъхьаIэхэм ягупчэ итыгъ.

ФутболымкIэ турнирэу зэхащагъэм кIэщакIо фэхъугъ ЕмтIылъ Рустам. Джащ фэдэу Iофтхьабзэм изэхэщэн хэлэжьагъэх гъэзетэу «Адыгэ макъэмрэ» общественнэ организациеу «Адыгэ Хасэмрэ».КIэух ешIэгъум щызэIукIэгъэх: «Картонтара» — «Звезда» — 2:2 (4:3 пенальтикIэ).Финалыр гъэшIэгъонэу кIуагъэ, охътэ шъхьаIэр 2:2-у аухыгъ. Ащ къыхэкIыкIэ текIоныгъэр къыдэзы­хыщтыр пенальтикIэ къэнэфагъ. «Картонтарэр» нахь лъэшыгъ, ащ зэнэкъокъум и Кубок фагъэшъо­шагъ.Я 3-рэ чIыпIэм икъыдэхын фэбэнагъэх: «Спорттур» — «Адыгэ макъ» — 4:2.«Спортуррыр» 4:2-у «Адыгэ макъэм» текIуи, ящэнэрэ хъугъэ. ЕшIэгъур аухынкIэ такъыкъитIу къэнагъэу «Спорттурым» къэлапчъэм дидзэгъэ IэгоуитIум ишIуагъэ­кIэ мы командэм хэтхэм джэрз медальхэр къахьыгъэх.

ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм защафэгушIогъэхэ Iофтхьабзэр фэбагъэ хэлъэу рекIокIыгъ. ЗэхэщакIохэм къэлэпчъэIут, ухъумэкIо ыкIи ыпэкIэ щешIэрэ футболист анахь дэгъухэр, къэлапчъэм анахьыбэрэ Iэгуаор дэзыдзагъэр хагъэунэфыкIыгъэх. Ахэм щытхъу тхылъхэр, медальхэр ыкIи ахъщэ шIухьафтынхэр афагъэшъошагъэх.Ау пстэуми анахь шъхьэIагъэр ЕмтIылъ Нурбый иунагъо апэрэ турнирым исимволическэ Кубок зэрэратыгъэр ары.ЕмтIылъ Нурбый ишIэжь фэгъэ­хьы­гъэ зэнэкъокъур дахэу рагъэкIо­кIыгъ. ЗэхэщакIохэм ащыщ къызэриIуагъэу: «Нурбый Сахьидэ ыкъом сыдигъуи къыIощтыгъ спортым цIыфхэр зэрэзэрипхыхэрэр. Непэ ар къэдгъэшъыпкъэжьыгъ». Джы ятIонэрэ турнирым тыщызэIукIэщт.