АР-м и ЛIышъхьэ ипресс-къулыкъу
Олимпиадэ рейтингымкIэ Урысыем и Къыблэ ишъолъырхэм азыфагу Адыгэ Республикэм апэрэ чIыпIэр щиубытыгъ.
КIэлэеджакIохэм я Урысые олимпиадэу предмет 24-мкIэ зыщызэнэкъокъухэу гъэтхапэм и 14-м къыщегъэжьагъэу жъоныгъуакIэм и 3-м нэс кIуагъэм икIэуххэм атетэу рейтингыр къагъэхьазырыгъ.Илъэсым къыкIоцI тиреспубликэ лъэоенэ 53-кIэ нахь лъагэу дэкIоягъ, хэгъэгум ишъолъырхэмкIэ я 22-рэ, Къыблэ федеральнэ шъолъырымкIэ а 1-рэ чIыпIэр ыубытыгъ. Шъолъыр 39-р рейтингым щылъыкIотагъэх, 9-р — зытетыгъэм тетэу къэнэжьыгъэх, 42-мэ яIофхэр къеIыхыгъэх.КъэIогъэн фае лъэшэу зыщызэнэкъокъугъэхэ Урысые олимпиадэм Адыгеим гъэхъэгъэшхохэр зэрэщишIыгъэр. Урысые олимпиадэм икIэуххэм атетэу диплом 4240-рэ текIоныгъэр къыдэзыхыгъэ нэбгырэ 732-мэ ыкIи шIухьафтын къызыфагъэшъошэгъэ нэбгырэ 3508-мэ аратыгъ. Адыгеим икIэлэеджакIохэри ахэм къахэфагъэх.
«ХимиемкIэ кIэлэеджакIохэм я Урысые олимпиадэ шIухьафтын къыщызыхьыгъэ Максим Попандопуло, биологиемкIэ атекIогъэхэ Шыхьамырзэ Джантэмыр, Анна Абросимовам, Алина Лохматовам, инджылызыбзэмкIэ олимпиадэм шIухьафтын къыщызыхьыгъэ Егор Мальковым, хьисапымкIэ — Роман Кузнецовым джыри зэ сигуапэу сафэгушIо. КIэлэегъаджэхэм, ны-тыхэм, кIэлэеджакIохэм ягъэхьазырын зиIахь хэзышIыхьэгъэ пстэуми шъхьафэу «тхьашъуегъэпсэу» ясэIо.Къыхагъэщыгъэ тикIэлэеджакIохэм тарэгушхо. ЗэрэакъылышIохэм имызакъоу, хэгъэгум игупчэхэу гъэсэныгъэ дэгъу зыщарагъэгъотыхэрэм Адыгеир зэращыщыр ахэм къагъэлъэгъуагъ. КIэлэеджакIохэм ягъэхъагъэхэм якъэкIуапIэр кIэлэцIыкIу сэнаущхэм IэпыIэгъу ягъэгъотыгъэнымкIэ Iофышхо тиреспубликэ зэрэщызэшIуахырэр ары. НыбжьыкIэхэм яинтеллектуальнэ амалхэм зыкъызэIуягъэхыгъэнымкIэ ищыкIэгъэ амалхэр зетэхьэх, кIэлэеджэкIо, кIэлэегъэджэ сэнаущхэм IэпыIэгъу тафэхъу, гъэсэныгъэмкIэ инфраструктурэм зетэгъэушъомбгъу. Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм, «Единэ Россием» инароднэ программэ къытатырэ амалыкIэхэри, ыпэкIэ тшIагъэхэри къызфэтэгъэфедэх.КIэлэеджакIохэм къулайныгъэу яIэр къагъэлъэгъонымкIэ, шIэныгъэ куу ягъэгъотыгъэнымкIэ Адыгеим игурыт еджапIэхэм, республикэ естественнэ-хьисап еджапIэм, гъэсэныгъэ тедзэ языгъэгъотырэ гупчэхэу «Полярис-Адыгея», «Кванториум», «IT-куб» зыфиIохэрэм афэдэхэм ыкIи нэмыкIхэм якIэлэегъэджэ IэпэIасэхэр IэпыIэгъу къафэхъух. Къалэхэми, къуаджэхэми адэс кIэлэцIыкIухэм гъэсэныгъэ ягъэгъотыгъэнымкIэ зэфэдэ амалхэр яIэным тыпылъ. ШIэныгъэу тикIэлэеджакIохэм зэрагъэгъотырэр республикэ гупсэм пае къызфагъэфедэн зэралъэкIыщтым тицыхьэ телъ. Еджэныр ахэм къызаухкIэ, сэнэхьат зэфэшъхьафхэмкIэ Iоф ашIэнэу тэгугъэ. Республикэм иэкономикэ зыкъезыгъэIэтыщт, лъэныкъо пстэури ыпэкIэ лъызыгъэкIотэщт IофышIэ IэпэIасэхэр, пшъэдэкIыжь зэрахьырэр икъоу къызыгурыIохэрэр тищыкIагъэх. КъыткIэхъухьэрэ ныбжьыкIэхэм Iоф адэшIэгъэнымкIэ Владимир Путиным пшъэрылъэу къыгъэуцугъэхэр дгъэцэкIэщтых. ТапэкIи Адыгеим иинтеллектуальнэ амалхэм зядгъэушъомбгъущт — ти Хэгъэгу инеущырэ мафэ нахь дахэ хъуным ар икъэкIуапI!» — къыIуагъ АР-м и ЛIышъхьэу КъумпIыл Мурат.